უკრაინამ და ევროკავშირმა 8.35 მილიარდი ევროს მაკროფინანსური დახმარების მემორანდუმს მოაწერეს ხელი, რომელიც ევროკავშირის 90 მილიარდი ევროს მოცულობის სასესხო პროგრამის ფარგლებშია გათვალისწინებული. ინფორმაციას European Pravda ავრცელებს.

ევროკავშირის ეკონომიკის კომისრის, ვალდის დომბროვსკისის ოფისის ინფორმაციით, 20 მაისს დომბროვსკისმა მემორანდუმს ხელი ევროკავშირის სახელით მოაწერა.

ახლა დოკუმენტის რატიფიცირება უკრაინის პარლამენტმა უნდა გააკეთოს.

შეთანხმება უკრაინას საშუალებას მისცემს, 2026 წელს სახელმწიფო ბიუჯეტის მხარდასაჭერად 8.35 მილიარდი ევრო მიიღოს.

კიდევ 8,35 მილიარდი ევროს გამოყოფაა მოსალოდნელი "უკრაინის ფონდის“ მექანიზმის ფარგლებში. უკრაინულ მხარესთან მოლაპარაკებები მის მარეგულირებელ ჩარჩოზე კვლავ გრძელდება და მოსალოდნელია, რომ უახლოეს მომავალში დასრულდება.

აქამდე გამოცემა European Pravda-სთვის ცნობილი გახდა, რომ უკრაინას მოუწევს მთელი რიგი რეფორმების გატარება კანონის უზენაესობისა და კორუფციასთან ბრძოლის მიმართულებით, რათა მიიღოს ბიუჯეტის მხარდაჭერის ნაწილი ევროკავშირის 90 მილიარდი ევროს სასესხო პროგრამიდან.

წყაროებმა European Pravda-ს განუცხადეს, რომ ეს მოთხოვნები დაეფუძნება გეგმის ელემენტებს, რომლებიც ევროკავშირის გაფართოების კომისარმა მარტა კოსმა და ევროპული და ევროატლანტიკური ინტეგრაციის საკითხებში უკრაინის ვიცე-პრემიერმა ტარას კაჩკამ შეიმუშავეს. ეს ეხება რეფორმებს კანონის უზენაესობისა და ანტიკორუფციულ სფეროებში, სადაც უკრაინა ამჟამად არ აჩვენებს საკმარის პროგრესს.