დიდი ბრიტანეთის მთავრობამ შეამსუბუქა მკაცრი სანქციები რუსულ ნედლ ნავთობზე, რაც ფასების მკვეთრი ზრდის ფონზე მესამე ქვეყნებში გადამუშავებული საავიაციო საწვავისა და დიზელის იმპორტის საშუალებას იძლევა.

სავაჭრო ლიცენზიას, რომელიც ძალაში ოთხშაბათს შევიდა, მოქმედების განსზაღვრული ვადა არ გააჩნია, თუმცა იგი პერიოდულად გადაიხედება. ეს გადაწყვეტილება მიღებულია გარკვეული სახეობის საწვავის მიწოდებასთან დაკავშირებით მზარდი შეშფოთების ფონზე, რაც გამოწვეულია ჰორმუზის სრუტის დე ფაქტო ბლოკადით აშშ-ისრაელისა და ირანის ომის დაწყების შემდეგ.

ევროპის საავიაციო საწვავის ნახევარზე მეტი სწორედ ჰორმუზის სრუტის გავლით ტრანსპორტირდება და მიწოდების შეფერხების შედეგად, ევროპაში საავიაციო საწვავის ფასი თითქმის გაორმაგდა ომის დაწყებამდე არსებულ მაჩვენებელთან შედარებით.

თებერვლის ბოლოს, აშშ-ისა და ისრაელის პირველ საჰაერო დარტყმებამდე, ევროპაში საავიაციო საწვავი ტონაზე 831 დოლარი ღირდა. აპრილის დასაწყისისთვის ფასმა 1 838 დოლარს მიაღწია, რის შემდეგაც კლება დაიწყო და ამჟამად 1 375 დოლარს შეადგენს.

წლების განმავლობაში დიდი ბრიტანეთი ლიდერობდა უკრაინაში ომის გამო რუსეთზე ეკონომიკური ზეწოლის განხორციელებაში. სამშაბათს მან ხელი მოაწერა "დიდი შვიდეულის" განცხადებას, რომელშიც კიდევ ერთხელ დაადასტურა თავისი "ურყევი ერთგულება" რუსეთისთვის "მკაცრი საფასურის" დაკისრებისადმი. მანამდე ბრიტანეთმა განაცხადა, რომ დაბლოკავდა სხვა ქვეყნებში გადამუშავებულ რუსულ ნავთობს, რათა "კიდევ უფრო შეეზღუდა კრემლისკენ ფინანსების დინება."

ამ კვირაში აშშ-ის ფინანსთა მინისტრმა, სკოტ ბესენტმა, 30 დღით გააგრძელა სანქციების საგამონაკლისო რეჟიმი, რაც უკვე ზღვაში მყოფი რუსული ნავთობის პარტიების შეძენის საშუალებას იძლევა. მან X-ზე გამოქვეყნებულ პოსტში აღნიშნა, რომ ვადის გაგრძელება "დამატებით მოქნილობას უზრუნველყოფს და ჩვენ ვიმუშავებთ ამ ქვეყნებთან, რათა საჭიროებისამებრ გავცეთ კონკრეტული ლიცენზიები".

"როდესაც საერთაშორისო კონფლიქტები მიმდინარეობს... ჩვენ, როგორც მთავრობამ, უნდა უზრუნველვყოთ დიდი ბრიტანეთის ეროვნული ინტერესების დაცვა და დავრწმუნდეთ, რომ ამ კონფლიქტების გავლენისგან, რომელიც ჩვენს ნაპირებამდე აღწევს, თითოეულ ოჯახს ვიცავთ," — განაცხადა ფინანსთა სამინისტროს წარმომადგენელმა დენ ტომლინსონმა ტელეკომპანია Sky News-სთან.