13 მაისს პარტია გახარია საქართველოსთან დაკავშირებულმა ფეისბუქ-გვერდმა ვიდეორგოლი გაავრცელა, სადაც აღნიშნულია, რომ ქართული ოცნების წარმომადგენლებს წინა ხელისუფლების დროს სხვადასხვა თანამდებობები ეკავათ.

ვიდეორგოლში ქართული ოცნების დეპუტატი ირაკლი ქადაგიშვილი "პუტჩისტადაა" მოხსენებული, პარლამენტის ვიცესპიკერი გია ვოლსკი ენმ-ს ხელისუფლებაში ყოფნის დროს სახელმწიფო მინისტრის მოადგილე იყო, დეპუტატი მარიამ ლაშხი — ეკონომიკის სამინისტროში მუშაობდა, საგარეო ურთიერთობათა კომიტეტის თავმჯდომარე ნიკოლოზ სამხარაძე უშიშროების საბჭოს ანალიტიკოსი იყო და ა.შ. ამავე ფეისბუქ-გვერდმა 14 მაისს ე.წ "ქარდი" გამოაქვეყნა, სადაც ჩანს, რომ ოცნების დეპუტატ თენგიზ შარმანაშვილს სამუშაო ოთახში მიხეილ სააკაშვილის სურათი უკიდია. ცნობისათვის, წინა ხელისუფლების პერიოდში შარმანაშვილი სომხეთში საქართველოს ელჩი იყო.

ფოტო: გახარია news საქართველოსთვის/ვიდეო

ფოტო: გახარია news საქართველოსთვის/ვიდეო

დღეს პარლამენტის პლენარულ სხდომაზე გახარია საქართველოსთვის წევრმა, სოფო ხორგუანმა ტრიბუნიდან ირაკლი ქადაგიშვილს შემდეგი სიტყვებით მიმართა: "როცა ქადაგიშვილი მის თანაგუნდელებს ლანძღავს, ლოცავს მისი რეპუტაცია — იმ ადამიანის რეპუტაცია, რომელიც მონაწილეობდა ეროვნული, არჩეული პრეზიდენტის დამხობაში და ძმათა მკვლელი ომის მოწყობაში".

ხორგუანის გამოსვლის შემდეგ შალვა პაპუაშვილმა გახარია საქართველოსთვის წევრების ქმედებას სამარცხვინო უწოდა.

"ახლა რაც იკადრეთ ირაკლი ქადაგიშვილზე, ასევე, რაც გუშინ ვნახეთ და თქვენი ამჩატებული პიართანამშრომლის ქცევა გვეგონა, თურმე თქვენი იდეოლოგია ყოფილა. ეს არის სამარცხვინო. მგონი ხედავთ, რომ რაღაცები არ უნდა იკადროთ. როდესაც დარბაზში სხედხართ თქვენს კოლეგებთან ერთად, არ უნდა წახვიდეთ და თქვენს პიარს არ უნდა აკეთებინოთ ის, რომ ასეთი უღირსი საქციელი იკადროთ. მეგონა, რომ სადღაც პარტიაში ვიღაც პიარი ჰყავთ ცოტა ამჩატებული, მაგრამ ამ ტრიბუნიდან ეს რომ იკადრეთ ირაკლი ქადაგიშვილის წინააღმდეგ, არ ვიცი რა ღირებულებზე, რა ეროვნულ თანხმობებზე უნდა ვისაუბროთ. [...] თუ ეს არის თქვენი ხაზი, დაე ასე იყოს. კი ბატონო, ასე გინდათ? — ასე იყოს თქვენი ხაზი მაშინ. ბერლინში რომ გიზით თქვენი ხელმძღვანელი, სად არის დამალული? რატომ არ ჩანს? სად არის გახარია? რომ აკურცხლა აქედან? გიორგი გახარია არის თქვენი იდეალი და ირაკლი ქადაგიშვილი საკრიტიკებელი? საერთო ჯამში ეს მეტყველებს ღირებულებითად სად დგახართ. თუ გინდათ ეს ხაზი გააგრძელოთ, კი ბატონო, მიიღებთ შესაბამის პასუხს. აქ ვინ არ მჯდარა წინა მოწვევაში, გაწევ-გამოწევა იყო, ყველაფერი იყო, მაგრამ არავის არ უკადრია," — განაცხადა პაპუაშვილმა.