SOCAR-ის ცნობით, Italiana Petroli-ს (IP) აქციების 99.82%-ის API Holding-ისგან შეძენის ტრანზაქციის დასრულების შემდეგ, საქართველოს ყოფილი ეკონომიკის მინისტრი ლევან დავითაშვილი IP-ის აღმასრულებელ დირექტორად დაინიშნა. ამის შესახებ აზერბაიჯანული მედია წერს. იტალიური გამოცემის ცნობით, დავითაშვილი კომპანიაში მმართველ დირექტორის პოზიციასაც შეითავსებს.

ჯგუფის მიერ გავრცელებული განცხადების თანახმად, დავითაშვილი უხელმძღვანელებს IP-ის ოპერაციებს იტალიაში, "ბიზნესის უწყვეტობის უზრუნველყოფის, მისი პოზიციის შენარჩუნებისა და შემდგომი გაძლიერების, ასევე კომპანიის SOCAR ჯგუფში ინტეგრაციის ზედამხედველობის მიზნით".

"დავითაშვილი დანიშვნა ასახავს SOCAR-ის ერთგულებას იტალიის მიმართ თავდადებული ლიდერობის მეშვეობით, რომელსაც შეუძლია ჯგუფის საერთაშორისო სამრეწველო სიძლიერისა და სტრატეგიული ხედვის შერწყმა ადგილობრივი ბაზრისა და ინსტიტუციური ლანდშაფტის ღრმა გაგებასთან", — წერია განცხადებაში.

აზერბაიჯანული მედიის ცნობით, ლევან დავითაშვილი თავისუფლად ფლობს იტალიურ ენას, აქვს 25 წელზე მეტხნიანი გამოცდილება როგორც საჯარო, ასევე კერძო სექტორში მუშაობის.

შეგახსენებთ, რომ 2022 წლიდან 2025 წლამდე ის საქართველოს პირველი ვიცეპრემიერის და ეკონომიკისა და მდგრადი განვითარების მინისტრის თანამდებობას იკავებდა. ის ასევე ხელმძღვანელობდა საქართველოს მონაწილეობას "მწვანე ენერგეტიკული დერეფნის" ინიციატივაში, რომელიც სამხრეთ კავკასიას ევროკავშირის წევრ სახელმწიფოებთან აკავშირებს. ლევან დავითაშვილი SOCAR-ის პრეზიდენტის მრჩევლად 2025 წლის ნოემბრიდან მუშაობს.

ყოფილმა ვიცეპრემიერმა ლევან დავითაშვილმა საქართველო 18 თებერვალს დატოვა. ოცნების ყოფილი მაღალი მაღალჩინოსანი bm.ge-სთან აცხადებდა, რომ ქვეყნიდან საქმიანი ვიზიტის გამო მიემგზავრებოდა და მიმდინარე კვირის ბოლოს დაბრუნდებოდა. მანამდე, 17 თებერვალს ლევან დავითაშვილი და გაზისა და ნავთობის კორპორაციის ყოფილი გენერალური დირექტორი გიორგი ჩიქოვანი სუს-ში გამოკითხვაზე იმყოფებოდნენ.

როგორც NEWS.On.ge-ს სახელმწიფო უსაფრთხოების სამსახურში განუცხადეს, ლევან დავითაშვილი და გიორგი ჩიქოვანი სახელმწიფო უსაფრთხოების სამსახურის ანტიკორუფციულ სააგენტოში მიმდინარე გამოძიების ფარგლებში ერთ-ერთ მსხვილ ნავთობკომპანიასთან გაფორმებულ ხელშეკრულებასთან დაკავშირებით იკითხებოდნენ.

დაკითხვიდან გამოსულმა დავითაშვილმა განაცხადა, რომ სუს-ში კითხვები ევროპის გაზით მომარაგების საკითხში საქართველოს როლს ეხებოდა და საქართველოს გაზმომარაგებასთან დაკავშირებული ხელშეკრულებებიც განიხილეს.