დაივიწყეთ ძვირადღირებული ლოფერები და კლასიკური ფეხსაცმელი, ვატიკანში ისინი "ქუჩის სტილმა" ჩაანაცვლა. რომის პაპი, ლეო XIV, საზოგადოების წინაშე ვინტაჟური Nike-ის კედებით გამოჩნდა.

ეს მოულოდნელი კადრები ახალი დოკუმენტური ფილმის, Leone a Roma-ის ტრეილერში გამოჩნდა. ვიდეოში ჩანს, როგორ მიაბიჯებს 70 წლის პაპი ვატიკანში. ერთი შეხედვით, მას ტრადიციული თეთრი ანაფორა აცვია, თუმცა მთავარი ფეხსაცმელია: პაპს თეთრი, კლასიკური კედები აცვია, რომელზეც Nike-ის ლოგოა დატანილი.

ფოტო: Vatican News

სოციალურ ქსელებში ვირუსულად გავრცელებულმა კადრებმა მომხმარებლები ეკლესიის უძველესი ტრადიციებისა და თანამედროვე ამერიკული სტილის კონტრასტით გააოცა.

Reddit-სა და X-ზე ხუმრობები არ წყდება. ერთ-ერთმა მომხმარებელმა დაწერა: "ეშმაკს აცვია პრადა, პაპს კი — ნაიკი". ზოგი წერს, რომ ვატიკანი ოფიციალურად გადავიდა "ქუჩის სტილზე", სხვები კი ინტერესდებიან, თუ როდის გამოვა Nike-ის ლიმიტირებული კოლექცია — "Air Leo".

ექსპერტები და კოლექციონერები მაშინვე შეეცადნენ, კედების ზუსტი მოდელი დაედგინათ. ბევრს ფეხსაცმელი Air Force 1 ეგონა, თუმცა მალევე გაირკვა, რომ ეს Nike Franchise Low-ია. თავიდან ეს მოდელი 70-იან წლებში ჩოგბურთისთვის შეიქმნა, მოგვიანებით კი, როგორც ხელმისაწვდომი და ყოველდღიური ფეხსაცმელი, ისე დაბრუნდა გაყიდვაში.

ბევრისთვის ეს არჩევანი პაპის უშუალო ხასიათზე მიუთითებს. წარმოშობით ჩიკაგოელი ლეო XIV სპორტის მოყვარულია და თავის მშობლიურ გუნდს, Chicago White Sox-ს გულშემატკივრობს. სანამ ვატიკანში გადავიდოდა, მას ხშირად ხედავდნენ ადგილობრივ დარბაზებში, ჩვეულებრივი სპორტული სამოსით ვარჯიშისას.

თუკი წინა პაპებს წითელი ტყავის ფეხსაცმელები ეცვათ, პაპი ლეოს არჩევანი მის პრაქტიკულ და ადამიანურ მხარეზე მეტყველებს. აშკარაა, რომ "ხალხის პაპი" სადაც არ უნდა მიდიოდეს, მესაზე თუ სასეირნოდ, კომფორტს ყველაფერზე მაღლა აყენებს.