"ღირსეულთა შორის ღირსეული იქნა გამორჩეული" — საქართველოს სახალხო დამცველი, ლევან იოსელიანი სრულიად საქართველოს ახალი კათოლიკოს-პატრიარქის არჩევას ულოცავს. ამის შესახებ ინფორმაციას იოსელიანი სოციალურ ქსელში ავრცელებს.

მილოცვასთან ერთად, სახალხო დამცველმა მოიხსენია უწმინდელი და უნეტარესი, საქართველოს კათოლიკოს-პატრიარქი ილია II და მადლობა გადაუხადა მას დამსახურებული მემკვიდრეობისთვის.

"სრულიად საქართველოს და ყველა მართლმადიდებელ ქრისტიანს ვულოცავ კათოლიკოს-პატრიარქის არჩევას. ნამდვილად ღირსეულთა შორის ღირსეული იქნა გამორჩეული.
თქვენო უწმინდესობავ, გისურვებთ სიმტკიცესა და ძალას ამ მძიმე და საპასუხისმგებლო ჯვრის ზიდვის გზაზე. თქვენი და სრულიად საქართველოს სამოციქულო ეკლესიის როლი განსაკუთრებით დიდია ჩვენი ქვეყნისა და საზოგადოების გაერთიანების საქმეში.
მადლობას ვუხდი აწ განსვენებულ საქართველოს კათოლიკოს-პატრიარქ ილია II-ს იმ ღირსეული მემკვიდრეობისთვის, რომელიც სრულიად საქართველოს დაგვიტოვა და რომლის მოფრთხილებაც თითოეული ჩვენგანის ვალია.
მჯერა, უფალი მოგცემთ ძალას, რათა ღირსეულად იტვირთოთ სულიერი მამის მძიმე ჯვარი ჩვენი სამშობლოს საკეთილდღეოდ," — წერია განცხადებაში.

შეგახსენებთ, საქართველოს 142-ე კათოლიკოს-პატრიარქი სენაკისა და ჩხოროწყუს მიტროპოლიტი, საპატრიარქო ტახტის მოსაყდრე შიო მუჯირი გახდა. დღეიდან ასე იწოდება, როგორც მცხეთა-თბილისის მთავარეპისკოპოსი, ბიჭვინთის და ცხუმ აფხაზეთის მიტროპოლიტი და სრულიად საქართველოს კათოლიკოს-პატრიარქი შიო III.

ტახტის მოსაყდრემ კენჭისყრაზე 39 ხმიდან 22 ხმა მიიღო. დანარჩენი ორი კანდიდატიდან, მროველ-ურბნელმა მიტროპოლიტმა იობ აქიაშვილმა მიიღო 9 ხმა, ფოთისა და ხობის მიტროპოლიტმა გრიგოლ ბერბიჭაშვილმა 7 ხნა, 1 ხმა გაუქმდა.

შიო III-ის ინტრონიზაცია სვეტიცხოვლის საკათედრო ტაძარში იმართება.