პარლამენტის პლენარულ სესიაზე, 79 ხმით, ნაფიც მსაჯულთა სასამართლოსთან დაკავშირებული რეგულაციების შესახებ კანონპროექტს პირველი მოსმენით მხარი დაუჭირეს.

იუსტიციის სამინისტროსა და მთავარი პროკურატურის ინიციატივით, საქართველოს სისხლის სამართლის საპროცესო კოდექსს ემატება 211 მუხლი, რომლის თანახმად, ნაფიც მსაჯულთა სასამართლოები შეიქმნება თბილისის, ქუთაისის, ბათუმისა და რუსთავის საქალაქო, აგრეთვე ზუგდიდის, თელავისა და გორის რაიონულ სასამართლოებში. მათი სამოქმედო ტერიტორია განისაზღვრება საქართველოს იუსტიციის უმაღლესი საბჭოს გადაწყვეტილებით.

თავდაპირველად ნაფიც მსაჯულთა სისტემა საქართველოს მხოლოდ ორ ქალაქში (თბილისში და შემდგომ - ქუთაისში) ამოქმედდა.

გარდა ამისა, სისხლის სამართლის კოდექსში შედის ცვლილება, რომლის მიხედვით, ნაფიც მსაჯულად შეიძლება აირჩიონ გამომძიებლები, პოლიციელები, იურისტები, ფსიქოლოგები და ფსიქიატრები. აქამდე ამ პროფესიის ადამიანებს არ შეეძლოთ გამხდარიყვნენ ნაფიცი მსაჯულები.

კანონპროექტის თანახმად, აღნიშნული განპირობებულია იმ გარემოებით, რომ არ შეიძლება რომელიმე პროფესიისადმი კუთვნილება საფუძვლად დაედოს კანონისმიერ შეუთავსებლობას.

ინიციატორთა განმარტებით, გამომძიებლისა თუ ადვოკატის შემთხვევაში ნაკლებია მიკერძოების საფრთხე, ვინაიდან მათ, საკუთარი პროფესიიდან გამომდინარე, უკეთ აქვთ აღქმული მიუკერძოებლობის ვალდებულების არსი.

გარდა ამისა, კანონპროექტის თანახმად, "შეუთავსებელ" პირთა ჩამონათვალს ემატება ნასამართლობის მქონე პირები.

კანონპროექტის ავტორთა განცხადებით, ნასამართლობა საქმეში პირის ნაფიც მსაჯულად მონაწილეობის გამომრიცხველი შესაძლებლობაა.