რადიო თავისუფლების (RFE/RL) რუსულენოვანმა განყოფილებამ, "ეხო კავკაზამ", რომელიც 16 წლის განმავლობაში საქართველოსა და მის ოკუპირებულ რეგიონებს განვითარებულ მოვლენებს აშუქებდა, მუშაობა შეწყვიტა. გადაწყვეტილება ძალაში 2026 წლის 1 მაისიდან შევიდა. ინფორმაცია 3 მაისს "ეხო კავკაზას" ვებგვერდზე გავრცელდა.

ორგანიზაციის ხელმძღვანელობის განმარტებით, აღნიშნული ნაბიჯი სტრუქტურული ცვლილებების ნაწილია. "რადიო თავისუფლების" პრეზიდენტმა და გენერალურმა დირექტორმა, სტივენ კაპუსმა განაცხადა, რომ ამ ცვლილების ფარგლებში ზოგიერთ "ჭეშმარიტად ნიჭიერ" კოლეგას ემშვიდობებიან.

"ეს ზომები მიღებულია იმისთვის, რომ RFE/RL-მა შეინარჩუნოს გავლენიანი, რელევანტური და ფისკალურად პასუხისმგებლობიანი ორგანიზაციის პოზიცია... ამ რესტრუქტურიზაციის ფარგლებში, ჩვენ ვემშვიდობებით ზოგიერთ ჭეშმარიტად ნიჭიერ კოლეგას, რომლებმაც დიდი ხანი მიუძღვნეს თავი RFE/RL-ის მისიას", — განაცხადა კაპუსმა.

მიუხედავად "ეხო კავკაზას" დახურვისა, კორპორაციის პრესსამსახურის ინფორმაციით, რეგიონში განვითარებული მოვლენების გაშუქება სხვა ფორმატით გაგრძელდება.

"ქართული სამსახური გააგრძელებს მაუწყებლობას ქართულ ენაზე; რუსულენოვანი პროგრამების ახალი განყოფილება კი გააშუქებს ოკუპირებულ რეგიონებში [აფხაზეთსა და სამხრეთ ოსეთში — რედ.] მიმდინარე მნიშვნელოვან მოვლენებს რუსულენოვანი აუდიტორიისთვის", — აღნიშნულია ინფორმაციაში.

"ეხო კავკაზა" 2009 წლის 2 ნოემბერს დაარსდა. წლების განმავლობაში ის ერთ-ერთ ყველაზე მნიშვნელოვან პლატფორმას წარმოადგენდა ოკუპირებულ აფხაზეთსა და სამხრეთ ოსეთში მიმდინარე პროცესების ობიექტური გაშუქებისთვის. მას შემდეგ, რაც 2022 წელს ვებგვერდი რუსეთში დაიბლოკა, ხოლო თავად "რადიო თავისუფლება" "არასასურველ ორგანიზაციად" გამოცხადდა, ადგილზე მუშაობა მნიშვნელოვნად გართულდა. რედაქციის განცხადებით, წყაროებთან მუშაობა მხოლოდ ანონიმურად გახდა შესაძლებელი, რამაც საბოლოოდ მაუწყებლობის გაგრძელება შეუძლებელი გახადა.

ამჟამინდელი მონაცემებით, ვებგვერდი www.ekhokavkaza.com აღარ განახლდება, თუმცა მასალები მკითხველისთვის ხელმისაწვდომი არქივის სახით დარჩება. რედაქცია იმედოვნებს, რომ წლების განმავლობაში დაგროვილი ანალიტიკური და საინფორმაციო ბაზა კვლავაც გამოსადეგი იქნება რეგიონით დაინტერესებული პირებისთვის.