რუსეთის თავდაცვის სამინისტრომ სამშაბათს ოფიციალურად დაადასტურა, რომ მოსკოვის წითელ მოედანზე გამარჯვების დღისადმი მიძღვნილი ყოველწლიური აღლუმი, 1945 წლის შემდეგ პირველად, სამხედრო ტექნიკის კოლონების გარეშე გაიმართება. რუსული მედიის ინფორმაციით, უწყება აღნიშნულ გადაწყვეტილებას "მიმდინარე ოპერატიულ ვითარებას" უკავშირებს, — ინფორმაციას Kyiv Post ავრცელებს.

აღლუმში მონაწილეობას მიიღებენ შეიარაღებული ძალების ქვეითი კოლონა და საავიაციო ჯგუფები, თუმცა პროგრამით არ არის გათვალისწინებული ტანკების, ჯავშანტექნიკისა თუ სხვა მძიმე შეიარაღების ტრადიციული მსვლელობა. იმავე "ოპერატიული ვითარების" მოტივით, წლევანდელ საზეიმო ღონისძიებაში მონაწილეობას არ მიიღებენ სუვოროვისა და ნახიმოვის სამხედრო სასწავლებლების სტუდენტები და კადეტთა კორპუსების წარმომადგენლები. ნაცვლად ამისა, ღონისძიების ძირითადი აქცენტი ქვეითი კოლონების მარშზე გაკეთდება, რომელშიც სამხედრო-სასწავლო დაწესებულებებისა და შეიარაღებული ძალების სხვადასხვა დანაყოფების წარმომადგენლები ჩაერთვებიან.

საზეიმო ღონისძიების საავიაციო სეგმენტი სავარაუდოდ მოიცავს უმაღლესი პილოტაჟის ჯგუფებსა და "სუ-25" ტიპის მოიერიშე თვითმფრინავებს, რომლებიც მოსკოვის ცას რუსეთის სახელმწიფო დროშის ფერებში შეღებავენ. აღლუმის ტრანსლაციისას ასევე დაგეგმილია ე.წ. "სპეციალური სამხედრო ოპერაციის" ზონაში დისლოცირებული და საბრძოლო მორიგეობაზე მყოფი პირადი შემადგენლობის ვიდეოკადრების ჩვენება.

კრემლს ჯერჯერობით არ გამოუქვეყნებია იმ უცხოელ ლიდერთა სია, რომლებიც 9 მაისის ღონისძიებას დაესწრებიან. აღნიშნული მოცემულობა მკვეთრად კონტრასტულია 2025 წლის 80 წლისთავის საიუბილეო ზეიმთან, როდესაც მოსკოვმა წინასწარ და დიდი პომპეზურობით გაასაჯაროვა 29 უცხოელი ლიდერის, მათ შორის ჩინეთის პრეზიდენტის, სი ძინპინის სტუმრობის შესახებ ინფორმაცია.