თავდაცვისა და უსაფრთხოების კომიტეტმა სახელმწიფო უსაფრთხოების სამსახურის უფროსის თანამდებობაზე გეკა გელაძის კანდიდატურას მხარი დაუჭირა — ინფორმაციას საქართველოს პარლამენტი აცხადებს.

თავდაცვისა და უსაფრთხოების კომიტეტის სხდომაზე, დახურულ ფორმატში, სახელმწიფო უსაფრთხოების სამსახურის უფროსის თანამდებობაზე წარდგენილ გეკა გელაძეს მოუსმინეს. სახელმწიფო უსაფრთხოების სამსახურის უფროსის თანამდებობაზე წარდგენილმა კანდიდატმა კომიტეტის წევრებს საკუთარი ხედვა გააცნო და იმ საკითხებზე ისაუბრა, რომელიც სამსახურისთვის პრიორიტეტული და მნიშვნელოვანია.

კანდიდატის მოსმენა კითხვა-პასუხის ფორმატში წარიმართა. კომიტეტმა გეკა გელაძის კანდიდატურას მხარი დაუჭირა. კომიტეტის გადაწყვეტილებით, სახელმწიფო უსაფრთხოების სამსახურის უფროსის არჩევის საკითხი, პარლამენტის პლენარულ სხდომაზე, განხილვის გარეშე, პირდაპირ კენჭისყრაზე დადგება.