საქართველოს პარლამენტში ინიცირებულია კანონპროექტი "საგადასახადო კოდექსში" ცვლილების შეტანის შესახებ, რომელიც სახელმწიფო საკუთრებაში მიქცეული საქონლის (მათ შორის, ავტომობილების) იმპორტისას აქციზის გადასახადისგან გათავისუფლებას ითვალისწინებს.

როგორც "საკანონმდებლო მაცნეში" ვკითხულობთ, ცვლილების ავტორები პარლამენტის წევრები: შოთა ბერეკაშვილი, ანტონ ობოლაშვილი, გიორგი ბარვენაშვილი, თორნიკე ბერეკაშვილი, ლევან მაჭავარიანი და მარიამ ლაშხი არიან.

მოქმედი კანონმდებლობით, სახელმწიფო საკუთრებაში გადასული ქონება გათავისუფლებული იყო დღგ-სა და იმპორტის გადასახადისგან, თუმცა შეღავათი არ ვრცელდებოდა აქციზზე. ეს ქმნიდა ვითარებას, როდესაც სახელმწიფო ჩამორთმეულ აქციზურ საქონელს (მაგალითად, მსუბუქ ავტომობილს) საკუთრებაში იღებდა, მას თავადვე უწევდა ბიუჯეტში აქციზის გადახდა ამ ქონების "თავისუფალ მიმოქცევაში" გასაშვებად.

კანონპროექტის განმარტებითი ბარათის მიხედვით, ირღვეოდა საგადასახადო სისტემის ნეიტრალურობა. სახელმწიფოს უწევდა საკუთარი აქტივის მიმართ დამატებითი ფინანსური და ადმინისტრაციული რესურსის მობილიზება, რასაც ეკონომიკური შინაარსი არ გააჩნდა.
არსებული ხარვეზის გამო, ბოლო პერიოდში ფაქტობრივად შეჩერებული იყო ასეთი საქონლის სახელმწიფო საკუთრებაში გადაცემის პროცესი.

ცვლილება 194-ე მუხლის მე-5 ნაწილს ამატებს "ო" ქვეპუნქტს. რეფორმის შედეგად:

  • აქციზური საქონლის (ავტომობილები, ნავთობპროდუქტები, ალკოჰოლი) სახელმწიფო საკუთრებაში მიქცევისას სამართლებრივი ბარიერები იხსნება.

  • ქონების რეგისტრაცია და შემდგომი რეალიზაცია/განკარგვა უფრო სწრაფად მოხდება.

  • სამართალდამცავ და ქონების მართვის უწყებებს აღარ მოუწევთ ბიუჯეტიდან თანხების გამოყოფა "საკუთარი თავისთვის" გადასახადის გადასახდელად.

  • ფინანსური თვალსაზრისით, ცვლილება ფისკალურად ნეიტრალურია.

ფორმალურად, ბიუჯეტის საშემოსავლო ნაწილი მცირდება, თუმცა, ვინაიდან გადამხდელი თავად სახელმწიფო იყო, ეს პროცესი მხოლოდ ფინანსური რესურსის "შიდა გადაადგილებას" წარმოადგენდა.

მნიშვნელოვანია, რომ ცვლილება არ ეხება კერძო სექტორს — ბიზნესისა და ფიზიკური პირებისთვის აქციზით დაბეგვრის წესები უცვლელი რჩება.

კანონპროექტის ავტორები არ ითხოვენ დაჩქარებულ განხილვას, თუმცა კანონი გამოქვეყნებისთანავე ამოქმედდება, რადგან მისი იმპლემენტაციისთვის დამატებითი მოსამზადებელი ვადები საჭირო არ არის. უკუძალის მინიჭება გათვალისწინებული არ არის.