ცენტრალურ საარჩევნო კომისიაში ერთიანი ნაციონალური მოძრაობის წევრები მივიდნენ, მათ შორის ზაზა ბიბილაშვილი და თინა ბოკუჩავა. ისინი ცესკოს თავმჯდომარესთან, თამარ ჟვანიასთან შეხვედრას ითხოვენ.

ბიბილაშვილის თქმით, ქართულმა ოცნებამ ადამიანებს ინსტრუქცია მისცა, რომ 12 ან მაქსიმუმ პირველ საათამდე უნდა გამოცხადებულიყვნენ საარჩევნო უბნებზე, რომ შემდგომ ჰქონოდა საშუალება, რომ ის ხალხი, რომელიც არ გამოცხადდებოდა, იძულებით მიეყვანა ოცნების კანდიდატის მხარდასაჭერად:

"ქართული ოცნების დამკვირვებლები იდგნენ რეგისტრატორების მაგიდების უკან და ახდენდნენ ამომრჩევლის იდენტიფიცირებას იმ მიზნით, რომ მოეხდინათ ამ სიების გადამოწმება. გავიდა ორი საათი და ცესკოს ამაზე არანაირი რეაგირება არ ჰქონია."

ცესკოში კი აცხადებენ, რომ რეგისტრატორთან ამომრჩევლების მონაცემების გადამოწმება კანონიერია და ამომრჩეველთა სიაში ამომრჩევლის სახელი, გვარი და რეგისტრაციის ნომერი საჯარო ინფორმაციაა.