იუსტიციის უმაღლესი საბჭოს არამოსამართლე წევრის, ნაზი ჯანეზაშვილის განცხადებით, საბჭოს მოსამართლე წევრების მხრიდან არაეთიკური მომართვები გრძელდება. მისი თქმით, კონფიდენციალური ინფორმაცია კანდიდატების შეფასების შესახებ მოსამართლე წევრებისთვის ცნობილი გახდა:

"პირდაპირ ჩემ მიმართ იყო მომართვა საბჭოს იმ წევრების მხრიდან, რომლებსაც არ მოეწონათ ჩემი შეფასება. ეს არის სერიოზული პრობლემა. მე უნდა ვიყო დაცული იმისთვის, რომ ვისაც ვაფასებ მან არ იცოდეს რა ქულებით შევაფასე, რადგან ეს კონფიდენციალურია ორგანული კანონით".

დღეს საბჭო უვადოდ გამწესების მსურველ 38 მსურველს უყრის კენჭს. ცნობილი გახდა, რომ მასში მონაწილეობას არ მიიღებს უმაღლესი საბჭოს თავმჯდომარე, უზენაესი სასამართლოს მოსამართლე ნინო გვენეტაძე.

ცნობილია, რომ იუსტიციის უმაღლესი საბჭოს გადაწყვეტილებით თბილისის სააპელაციო სასამართლოს მოსამართლე, თამარ ალანია უვადო მოსამართლედ გამწესდა. ალანია უმაღლესი საბჭოს ყოფილი წევრია.