მოლდოვის რესპუბლიკა დამოუკიდებელ სახელმწიფოთა თანამეგობრობას (დსთ) ტოვებს — გადაწყვეტილება პარლამენტმა საბოლოო მოსმენით დაამტკიცა: ინიციატივას მხარი დაუჭირა 60-მა დეპუტატმა, 27-მა ხმა წინააღმდეგ მისცა, ხოლო 3-მა თავი შეიკავა — ინფორმაციას TV8 ავრცელებს. მოლდოვამ დსთ-დან ეტაპობრივი გამოსვლის შესახებ ჯერ კიდევ 2023 წელს გამოაცხადა და ამ გადაწყვეტილებაზე გავლენა უკრაინაში რუსეთის ინტერვენციამ იქონია.

პარლამენტის განცხადების თანახმად, დსთ-ს დატოვების სახელმწიფო ბიუჯეტი დაახლოებით 3,1 მილიონ ლეის (150 000 ევრო) დაზოგავს, რაც [დსთ-ს] ბიუჯეტში ყოველწლიურ შენატანს წარმოადგენდა. თანამეგობრობის წევრ სახელმწიფოებთან ურთიერთობები გაგრძელდება ორმხრივ რეჟიმში, ხოლო მოლდოვის რესპუბლიკა დარჩება [დსთ-ს] რამდენიმე ხელშეკრულების მონაწილედ, განსაკუთრებით სავაჭრო, ეკონომიკურ და სოციალურ სფეროებში.

"ამ შეთანხმებების დენონსაციის ინიციატორი იყო საგარეო საქმეთა სამინისტრო, რომელიც განმარტავს, რომ დსთ-ს ფუნდამენტური ღირებულებები და პრინციპები არ არის დაცული, განსაკუთრებით კი ის დებულება, რომლის მიხედვითაც წევრი სახელმწიფოები ორმხრივად აღიარებენ და პატივს სცემენ ტერიტორიულ მთლიანობასა და არსებული საზღვრების ხელშეუხებლობას. ეს პრინციპი, რომელიც საფუძვლად დაედო დსთ-ს ჩამოყალიბებას, დარღვეულია რუსეთის ფედერაციის მიერ, რომელიც აწარმოებს ომს უკრაინის წინააღმდეგ, ჩაიდინა აგრესიის აქტები საქართველოს წინააღმდეგ და უკანონოდ აგრძელებს სამხედრო ძალების ყოლას მოლდოვის რესპუბლიკის ტერიტორიაზე" — ნათქვამია განცხადებაში.

დღეის მდგომარეობით, მოლდოვის რესპუბლიკამ დსთ-ს ფარგლებში მიღებული დაახლოებით 70 შეთანხმების გააუქმა, რაც ეროვნული პოლიტიკის შესაბამისობაში მოყვანის, საკანონმდებლო და ეკონომიკური ჩარჩოების მოდერნიზაციისა და ევროკავშირის სტანდარტებთან და ნორმებთან დაახლოების უწყვეტი პროცესის ნაწილია.

გადაცემაში "ახალი კვირა" (TV8), საგარეო საქმეთა მინისტრმა, მიჰაი პოპშოიმ, განმარტა, რომ მოლდოვის რესპუბლიკის ხელისუფლებამ მოქალაქეებს მკაფიოდ უნდა გადასცეს განვითარების მიმართულება, ხოლო „ორ სკამზე ჯდომის“ მცდელობას სარგებელი არ მოაქვს და მხოლოდ გაურკვევლობას ქმნის.

"სოციალისტური პარტიის" (PSRM) დეპუტატმა, ოლგა ჩებოტარიმ, წამოაყენა წინადადება საკითხის დღის წესრიგიდან მოხსნის შესახებ, თუმცა ინიციატივამ ხმების საჭირო რაოდენობა ვერ დააგროვა. ამავდროულად, პრორუსულმა ოპოზიციამ პარლამენტში საგარეო საქმეთა მინისტრის მოსმენა მოითხოვა მას შემდეგ, რაც გუშინ მოსკოვმა განაცხადა, რომ "მოლდოვა არ არის იმ მდგომარეობაში, რომ დამოუკიდებლად გადაწყვიტოს დსთ-ს მიტოვება".

ცნობისთვის, დამოუკიდებელ სახელმწიფოთა თანამეგობრობის დაფუძნების შესახებ შეთანხმებას ხელი 11-მა ყოფილმა საბჭოთა სახელმწიფომ, მათ შორის მოლდოვის რესპუბლიკამ, 1991 წლის დეკემბერში მოაწერა. შეთანხმებისა და ოქმის მთავარი მიზანი სსრკ-ს არსებობის შეწყვეტის დადასტურება და დსთ-ს ფორმირება იყო. 1993 წლის 3 დეკემბერს, საქართველო დსთ-ში გაწევრიანდა. 2008 წლის 14 აგვისტოს კი საქართველოს პარლამენტმა ერთხმად მიიღო გადაწყვეტილება დსთ-დან გასვლის გადაწყვეტილება.