მსახიობმა ამანდა პიტმა ახლახან ჟურნალ The New Yorker-ში გამოქვეყნებულ ესსეში ჩემი ატივანის (დამამშვიდებლის) სეზონი ძუძუს კიბოს დიაგნოზზე ისაუბრა. მსახიობის თქმით, დაავადება იმ პერიოდში აღმოაჩნდა, როდესაც მისი ორივე მშობელი ჰოსპისში იმყოფებოდა.

"მრავალი წლის განმავლობაში მეუბნებოდნენ, რომ ე.წ. "მკვრივი" ჯირკვლები მქონდა, რაც იმას ნიშნავდა, რომ დამატებითი მონიტორინგი მჭირდებოდა. ყოველ ექვს თვეში ერთხელ მამოლოგთან ვიზიტზე დავდიოდი. გასული წლის სექტემბერში, გეგმიური კვლევისას, ექიმს ულტრაბგერითი სკანირების შედეგი არ მოეწონა და ბიოფსია დამინიშნა. მაშინვე მივხვდი, რომ რაღაც რიგზე ვერ იყო", — წერს პიტი.

პირველადი კვლევით მცირე ზომის სიმსივნე დადასტურდა. დამატებითმა ტესტებმა აჩვენა, რომ მსახიობს ჰორმონ-რეცეპტორ დადებითი და HER2-უარყოფითი ტიპის სიმსივნე ჰქონდა, რაც მკურნალობისთვის უფრო ხელსაყრელ ფორმად ითვლება. მიუხედავად იმისა, რომ MRI კვლევამ იმავე მკერდში მეორე წარმონაქმნიც გამოაჩინა, ბიოფსიამ დაადასტურა, რომ ის კეთილთვისებიანი იყო.

მსახიობის განმარტებით, მას I სტადიის ძუძუს კიბო დაუდგინდა. მას ჩაუტარდა ლუმპექტომია (სიმსივნური კვანძის ამოკვეთა) და დასხივების კურსი. ქიმიოთერაპია და ორმხრივი მასტექტომია საჭირო არ გახდა.

მიმდინარე წლის იანვარში ჩატარებულმა საკონტროლო კვლევამ აჩვენა, რომ მსახიობი დაავადებისგან თავისუფალია. ამ პერიოდს დაემთხვა მისი მშობლების გარდაცვალებაც, მსახიობის მამა 2025 წელს გარდაიცვალა, დედა კი — ახლახან.

წაიკითხეთ ესსე: ამანდა პიტი: ჩემი დამამშვიდებლის სეზონი

საქართველოში ძუძუს კიბოს ადრეული გამოვლენის მიზნით მოქმედებს სახელმწიფო სკრინინგის უფასო პროგრამა. ადრეულ ეტაპზე დიაგნოსტირება დაავადების განკურნების შანსს მნიშვნელოვნად ზრდის.