93 წლის ასაკში სრულიად საქართველოს კათოლიკოს-პატრიარქი ილია II გარდაიცვალა — ინფორმაცია საპატრიარქო ტახტის მოსაყდრე შიომ ჟურნალისტებს დაუდასტურა.

"ძალიან მიჭირს ახლა იმის თქმა, რაც უნდა მოგახსენოთ. რამდენიმე წუთის წინ, ღვითივგანისვენა საქართველოს კათოლიკოს-პატრიარქმა, უწმინდესმა და უნეტარესმა ილია მეორემ.

ეს იყო ეპოქალური ადამიანი, უდიდესი დანაკარგია მთელი მსოფლიო მართლმადიდებელი ეკლესიისთვის. მინდა, მივუსამძიმრო ყოველ ქართველს, მთელ საქართველოს, ჩვენს ეკლესიას და მთელ საქრისტიანოს.

მთელი ეპოქა შექმნა. ძნელია რამდენიმე სიტყვით რთულია საუბარი, იმდენად დიდი პიროვნებაზე ვსაუბრობთ, მისი მეშვეობით, მისი ღვაწლით ღმერთმა ხელახმა მოაქცია საქართველო სარწმუნოებაზე, ის იყო დიდი აღმშენებელი ჩვენი ეკლესიის, როგორც პირდაპირი, ისე გადატანითი მნიშვნელობით და დიდია დღეს ჩვენი გლოვა.

კიდევ ერთხელ მინდა მოგისამძრიმოთ ყველას, მთელ საქართველოს, მაგრამ ასეთი დიდი ადამიანები როდესაც გვტოვებენ, არის ასევე ნუგეშიც იმაში, რომ ჩვენ შევიძინეთ ზეციერი მფარველი, მთელმა საქართველომ და ყოველმა ჩვენგანმა, ვინაიდან ის ჩვენი მამა იყო, არის და იქნება, ვინაიდან ჩვენ ვართ მის ეპოქაში," — განაცხადა მეუფე შიომ.

17 მარტის დილას, ილია II-ის ჯანმრთელობის მდგომარეობა გაუარესდა. როგორც კავკასიის მედიცინის ცენტრის დირექტორმა, სოფიო ასპანიძემ განაცხადა, პატრიარქი კლინიკაში კუჭიდან მასიური სისხლდენით შეიყვანეს და ჯანმრთელობის კრიტიკული მდგომარეობის გამო მართვით სუნთქვაზე იმყოფებოდა.

1977 წლის 23 დეკემბერს ილია II (ერისკაცობაში — ირაკლი გიორგის ძე შიოლაშვილი) არჩეულ იქნა სრულიად საქართველოს კათოლიკოს-პატრიარქად. 2010 წლის 21 დეკემბრის სინოდის სხდომის გადაწყვეტილებით, საქართველოს კათოლიკოს პატრიარქის ტიტულატურა შემდეგნაირად განისაზღვრა — უწმიდესი და უნეტარესი ილია II, საქართველოს კათოლიკოს-პატრიარქი, მთავარეპისკოპოსი მცხეთა-თბილისისა და მიტროპოლიტი ბიჭვინთისა და ცხუმ-აფხაზეთის. ილია II საქართველოს კათოლიკოს-პატრიარქი თითქმის ხუთი ათეული წელი იყო.