აჭარაში მასშტაბური სპეცოპერაცია ჩატარდა. ამის შესახებ ინფორმაცია თავდაპირველად სამთავრობო ტელეკომპანია "იმედმა" გაავრცელა. მათი განმარტებით, სპეცოპერაციაში შინაგან საქმეთა და უსაფრთხოების სამსახურის ასეულობით წარმომადგენელი მონაწილეობდა.

"ტვ პირველი" კი წერს, რომ სპეცოპერაცია ერთდროულად რამდენიმე ლოკაციაზე ჩატარდა და მისი მსვლელობისას 75 წლის პენსიონერი ქალი ფეხში დაჭრეს. IPN აღნიშნულ ცნობას უარყოფს და წერს, რომ ქალი შუშის შედეგად იყო დაშავებული და კლინიკიდან უკვე გამოწერე.

მათი ცნობით, ხელვაჩაურის მუნიციპალიტეტში, სპეცოპერაციის დროს დაშავებულ 75 წლის ქალს პირველადი დახმარება ბათუმში, კლინიკა "ბაუში" გაუწიეს და მან კლინიკა უკვე დატოვა. როგორც კლინიკაში "ინტერპრესნიუსს" განუცხადეს, ქალს ფეხის არეში სავარაუდოდ, მინის შედეგად ჰქონდა დაზიანება მიღებული.

"ქალბატონი დღეს დილით შემოიყვანეს. დაჭრილი არ არის. გადაუდებელ სამსახურში ჩაუტარდა შესაბამისი მკურნალობა, სავარაუდოდ, მინის შედეგად აქვს ნაკაწრები მიღებული. დღეს დილით შემოიყვანეს და ამ დროისათვის, კლინიკაში არ იმყოფება", — აცხადებენ კლინიკა "ბაუში".

დაშავებული ქალი, სავარაუდოდ, ერთ-ერთი დაკავებულის დედაა. მათივე ცნობი, დაკავებისას ორმა პირმა, დაკავებამდე თვითდაზიანება მიიყენა.

სპეცოპერაცია ხელვაჩაურის მუნიციპალიტეტის სოფელ შარაბიძეებში ჩატარდა და ქურდულ სამყაროსთან კავშირის ბრალდებით 80-მდე ადამიანი დააკავეს, — წერს IPN.

სუს-ს და შსს-ს სპეცოპერაციასტან დაკავშირებით ამ დრომდე ოფიციალური განმარტება არ გაუკეთებიათ.

ინფორმაცია განახლდება.