10 წლის მაქს ალექსანდერი გახდა მსოფლიოში ყველაზე ახალგაზრდა დიზაინერი, რომელმაც თავისი კოლექცია პარიზის მოდის კვირეულზე წარადგინა.

მეოთხეკლასელი მაქსი ოთხი წლიდან უკვე გატაცებული იყო კერვითა და დიზაინით. მისი დებიუტი პარიზის მოდის კვირეულზე წელს შედგა, სადაც მაქსმა 2026-2027 წლების შემოდგომა/ზამთრის კოლექცია წარადგინა.

ფოტო: Blanca CRUZ / Getty

მაქსმა მოდის კვირეულზე 15 ლუქი წარადგინა, რომელთა ინსპირაციაც ყვავილები იყო.

""კოლექციის 90% ეკოლოგიურად სუფთა მასალებისგანაა შექმნილი, შთაგონება კი ყვავილები იყო", — ამბობს 10 წლის დიზაინერი.

მან ასევე დასძინა, რომ მასალად გამოყენებული იყო გადამუშავებული ჩანთები და ბიოდეგრადირებადი ქსოვილები, კოლექციაზე მუშაობას კი ნახევარი წელი დასჭირდა.

აღსანიშნავია, რომ ახალგაზრდა დიზაინერის დებიუტი შედგა 2024 წელს, ნიუ-იორკის მოდის კვირეულზე, რა დროსაც მაქსი სულ რაღაც რვა წლის იყო.

მაქსი 2024 წლის ნიუ-იორკის მოდის კვირეულზე

მაქსი 2024 წლის ნიუ-იორკის მოდის კვირეულზე

ფოტო: Getty Images

""ბედნიერი ვარ, რომ მსოფლიოს ჩემი ნამუშევრები ვუჩვენე", — ამბობს დიზაინერი — "და შესაძლოა, ადამიანებს ბიძგი მივცე, დაფიქრდნენ ნივთების ხელახალ გამოყენებაზე და 'სწრაფი მოდის' სამოსი აღარ შეიძინონ".

როგორც მაქსის დედამ People-თან ინტერვიუში აღნიშნა, მაქსი ძალიან ერთობა თავისი საქმით და მუშაობის პროცესი აბედნიერებს. თავიდან ეგონათ, რომ მაქსი გადაიფიქრებდა და სხვა გატაცებას იპოვიდა, თუმცა 10 წლის დიზაინერი პროფესიის მიტოვებას არ გეგმავს.

"რაც უჩვეულოა და ჩემზე დიდ შთაბეჭდილებას ახდენს, ასეთი პატარა ბავშვის თავდადება და მისი გულწრფელი მისწრაფებაა, რომ სხვებს თავი ლამაზად აგრძნობინოს, სწორედ ამას გვეუბნება 4 წლის ასაკიდან", — განმარტავს მაქსის დედა.

და რას აპირებს მაქსი მომავალში? — როგორც მან ჟურნალ People-ს განუცხადა, ის აპირებს, რომ ცოტა ხნით დაისვენოს. 10 წლის დიზაინერს სურს, კიდევ უფრო მეტი კოლექცია შექმნას და მთელს მსოფლიოს გაუზიაროს.