დრეზდენში, კაროლას ხიდთან ახლოს, მდინარე ელბას ნაპირზე, ბრიტანეთში წარმოებული 250 კილოგრამიანი ბომბი აღმოაჩინეს, რის შემდეგაც ქალაქის 18 000-მდე მცხოვრების ევაკუაცია გახდა საჭირო. როგორც DW წერს, ბომბი მეორე მსოფლიო ომის დროინდელია.

გამოცემა წერს, რომ სახანძრო სამსახურმა ელბას ნაპირზე, კაროლას ხიდთან (Carola-Brücke) ორი საეჭვო ობიექტი იპოვა. ექსპერტებმა მოგვიანებით დაადასტურეს, რომ ერთ-ერთი მათგანი ასაფეთქებელი მოწყობილობა იყო.

ბრიტანეთში წარმოებული 250 კილოგრამიანი ბომბი 11 მარტს გააუვნებელყოფენ. ხელისუფლებამ ეს ევაკუაცია მეორე მსოფლიო ომის შემდეგ დრეზდენში ყველაზე მასშტაბურ ევაკუაციად შეაფასა.

აღმოჩენილი ბომბის ფიტული დაზიანებულია და მისი ამოღება მხოლოდ სპეციალიზებული აღჭურვილობის — წყლის ჭავლური საჭრელის — გამოყენებით არის შესაძლებელი. ამიტომ, პოლიცია ვარაუდობს, რომ გაუვნებელყოფის პროცედურა გადაიდება.

"ჩვენ ვიმედოვნებთ, რომ დრეზდენის მაცხოვრებლებისთვის უხერხულობა მინიმუმამდე იქნება დაყვანილი", — განაცხადა პოლიციის წარმომადგენელმა მარკო ლასკემ და დასძინა, რომ "უსაფრთხოება აქ მთავარი პრიორიტეტია".

ევაკუაციის ზონა აღმოჩენის ადგილის გარშემო 1000 მეტრის რადიუსს მოიცავს, მათ შორის — ქალაქის მთავარ ღირსშესანიშნაობებს — ფრაუენკირხეს ეკლესიას და ზემპეროპერის ოპერის თეატრს. ასევე — პოლიციის შტაბ-ბინას, საქსონიის სახელმწიფო პარლამენტს, რამდენიმე სამინისტროს, მოხუცებულთა სახლებს, საბავშვო ბაღებს და სხვა სოციალურ დაწესებულებებს.

DW წერს, რომ გასულ წელს ხიდზე დანგრევის სამუშაოების დროს ოთხი ბომბი აღმოაჩინეს, რამაც აგვისტოში 17 000 ადამიანის ევაკუაცია გამოიწვია.

დრეზდენის დაბომბვა 1945 წლის 13-15 თებერვალს მოხდა. ბრიტანულმა და ამერიკულმა საჰაერო დარტყმებმა ქალაქის ისტორიული ცენტრის თითქმის 90% გაანადგურა, რის შედეგადაც 25 000-მდე ადამიანი დაიღუპა.