ტექნოლოგიების სფეროში განათლების მიღება, დროის სვლასთან ერთად, სულ უფრო მნიშვნელოვანი ხდება, განსაკუთრებით კი, ახალგაზრდებისთვის, რომლებიც ინდუსტრიის სწრაფი ცვლილებებისთვის ფეხის აწყობას ცდილობენ.

სწორედ ამ მიზანს ემსახურება თიბისი IT აკადემიის სხვადასხვა საგანმანათლებლო ინიციატივა, რომელიც სტუდენტებს არა მხოლოდ თეორიული ცოდნის მიღების შესაძლებლობას აძლევს, არამედ პრაქტიკულ გამოცდილებასაც. როგორც თიბისი IT აკადემიის ლიდი თათა ანჯაფარიძე აღნიშნავს, მისი მთავარი მოტივაციაც სწორედ ესაა და ბოლოს განხორციელებული ორი მნიშვნელოვანი პროექტი ზუსტად ამ მიდგომას ეფუძნება.

"გვინდა, სტუდენტებმა მიიღონ რეალურ სამუშაო გარემოსთან მაქსიმალურად დაახლოებული პრაქტიკული გამოცდილება. სწორედ ამიტომ ვქმნით ინიციატივებს, როგორებიცაა სტუდენტური Meet-up-ები და Cross-Collaboration პროექტები, სადაც ისინი ეუფლებიან თანამედროვე ტექნოლოგიურ პრაქტიკებს, მუშაობენ მრავალფუნქციურ გუნდებად და გადიან პროდუქტის შექმნის სრულ ციკლს.

გვჯერა, რომ ასეთი ფორმატი ახალგაზრდებს აძლევს თავდაჯერებას, აცნობს ინდუსტრიის რეალურ მოთხოვნებს და მნიშვნელოვნად უმარტივებს ტექნოლოგიურ კარიერაში პირველი ნაბიჯების გადადგმას. მიღებული გამოცდილება ახალ თაობას ტექნიკურ კომპეტენციებთან ერთად, უყალიბებს სისტემურ აზროვნებას, ეფექტური კომუნიკაციისა და სწრაფი ადაპტაციის უნარს, რომლებიც დღეს ტექ.ინდუსტრიაში კრიტიკულად მნიშვნელოვანია", — ამბობს თათა.

აღნიშნულმა პროექტებმა ასობით სტუდენტი გააერთიანა და მათ ტექნოლოგიურ სფეროში მუშაობის გამოცდილება მისცა.

სტუდენტური Meet-up-ების სერია — გზა ტექნოლოგიურ კარიერამდე

თიბისი IT აკადემიის მიერ ინიციირებული სტუდენტური შეხვედრების სერია მიზნად მომავალი თაობის IT პროფესიონალებისთვის აქტუალური ტექნოლოგიური ცოდნის, კარიერული განვითარების რჩევებისა და ინდუსტრიის საუკეთესო პრაქტიკების გაზიარებას ისახავდა.

სერიის ფარგლებში, ჩატარდა 4 შეხვედრა, რომელსაც 400-ზე მეტი მონაწილე დაესწრო. მნიშვნელოვანია, რომ შეხვედრებს თიბისი IT მიმართულების ლიდებთან ერთად, საერთაშორისო ტექნოლოგიური კომპანიის წარმომადგენლებიც უძღვებოდნენ.

ინტერაქციული შეხვედრების მიმდინარეობისას, მონაწილეებს კითხვების დასმის შესაძლებლობა ჰქონდათ, რომელთაც ინდუსტრიის გამოცდილი პროფესიონალები პასუხობდნენ. ვორქშოპების ფარგლებში, სტუდენტებმა იმუშავეს CV-ის და LinkedIn-ის პროფილების გაუმჯობესებაზე, მიიღეს პრაქტიკული რჩევები და ლაივ ინტერვიუს სიმულაციაშიც ჩაერთნენ.

რაც შეეხება ტექნიკურ მიმართულებას, ამ მხრივ, შეხვედრებზე ყურადღება დაეთმო Git-ისა და GitHub-ის მოწინავე პრაქტიკებს, Agile-ის პრინციპებს, Scrum-ის სტრუქტურასა და Atlassian-ის ინსტრუმენტების გამოყენებას თანამედროვე ციფრულ პროექტებში. მონაწილეებმა უკეთ გაიაზრეს, როგორია ტექნოლოგიური კომპანიების თანამშრომლების ყოველდღიურობა.

სერიის ერთ-ერთი გამორჩეული ნაწილი AWS-ის ფიზიკური ვორკშოპი იყო, რომელიც Amazon-ის ჯგუფის წარმომადგენელმა ჩაატარა. შეხვედრაზე სტუდენტებმა მეტი გაიგეს საერთაშორისო ტექნოლოგიური კომპანიის გამოცდილებასა და მიდგომებზეც.

პროექტში ჩართული მარიამ ჭუბაბრია ინიციატივის მნიშვნელობაზე საუბრობს.

"Meet-up-ის ფარგლებში ჩატარებული პრაქტიკული სესიები ნამდვილად დამეხმარა კარიერული ნაბიჯების უკეთ დაგეგმვასა და ტექნოლოგიური უნარების განვითარებაში. იმ საკითხების უმრავლესობა, რაც გვასწავლეს, მანამდე არ ვიცოდი, ამიტომ თითოეული ვორქშოპი ჩემთვის ახალი და ძალიან ღირებული გამოცდილება იყო", — აღნიშნავს ის.

Cross-Collaboration პროექტი — რეალური სამუშაო გარემოს სიმულაცია

აღნიშნულ შეხვედრებთან ერთად, თიბისი IT აკადემიამ კიდევ ერთი მასშტაბური ინიციატივა განახორციელა — 6-დღიანი, ჰაკათონის სტილის, Cross-Collaboration პროექტი, რომელიც სტუდენტური მარათონი იყო და თანამედროვე ტექნოლოგიური გუნდების მუშაობის სრულ ციკლს იმეორებდა.

პროექტში მონაწილეობა 150-მდე სტუდენტმა მიიღო, რომლებიც 15 მრავალფუნქციურ გუნდად დაიყვნენ. მონაწილეები 6 სხვადასხვა ტექნოლოგიურ მიმართულებას წარმოადგნენ: Frontend, .NET Backend, Test Automation, DevOps, iOS და Android Development. პროექტი Agile-ისა და Jira-ს ვორკშოპით დაიწყო, რა დროსაც სტუდენტებმა საბაზისო ინსტრუმენტები და მეთოდოლოგიური ცოდნა მიიღეს.

შემდეგი ერთი კვირის განმავლობაში მონაწილეები გუნდურად ქმნიდნენ MVP-ს — All-in-One Employee Engagement Platform-ს ვებ და მობილური ვერსიებით. პროექტი რეალურ ბიზნეს გამოწვევას პასუხობდა — ორგანიზაციებში მისკომუნიკაციასა და ღონისძიებების არაეფექტურ მართვას.

სტუდენტებმა საკუთარ თავზე გამოცადეს იდეის პროდუქტად ქცევის პროცესი მაშინ, როცა დროისა და რესურსებისა შეზღუდული პირობები გაქვს. მიუხედავად სხვადასხვა გამოწვევისა, ყველა გუნდის მიერ წარდგენილი პროექტი წარმატებული აღმოჩნდა და ტექნიკურ სიზუსტესთან ერთად, შემოქმედებითობითაც გამოირჩეოდა.

დემო დღეზე გუნდებმა თავიანთი ნამუშევრები თიბისი კონცეპტის მულტიფუნქციურ სივრცეში წარადგინეს. პროექტების პრეზენტაციას თიბისის ტექნოლოგიური მიმართულების ლიდები ესწრებოდნენ, რომლებმაც მონაწილეებს პროფესიული უკუკავშირი გაუზიარეს.

პროექტის ერთ-ერთი მონაწილე, ანა რუსეცკი აღნიშნავს, რომ მსგავსი პრაქტიკული ფორმატი მისთვის მნიშვნელოვანი გამოცდილება აღმოჩნდა.

"კურსის განმავლობაში ჩატარებული ყველა პრაქტიკული აქტივობა იყო შესაძლებლობა, პირადად გავცნობოდი დარგის გამოცდილი სპეციალისტებს, გამეზიარებინა მათი გამოცდილება და შემესრულებინა რეალობასთან მიახლოებული პრაქტიკული სავარჯიშოები.

განსაკუთრებულად სასარგებლო იყო Cross-Collaboration პროექტი, რომელიც დამეხმარა მრავალფუნქციურ ტექნიკურ გუნდთან მუშაობის უნარ-ჩვევების განვითარებაში და შესაძლებლობა მომცა, თანაგუნდელების დახმარებით შემექმნა რეალური პროდუქტი", — ამატებს ანა.

Cross-Collaboration-ის ინიციატივაზე მარიამ ჭუბაბრიაც საუბრობს და აღნიშნავს, რომ ეს პროექტი არა მხოლოდ პროფესიული, არამედ სოციალური უნარების განვითარებაშიც დაეხმარა და ასწავლა, როგორ მორგებოდა გუნდის სხვადასხვა წევრის განსხვავებულ სამუშაო სტილს ისე, რომ პროექტი სასურველ შედეგამდე ერთობლივად მიეყვანათ.

ამ პროცესში აღსანიშნავია ლექტორების გუნდის აქტიური ჩართულობაც. პროექტის განმავლობაში ისინი სტუდენტებს აქტიურ მენტორობას უწევდნენ, ეხმარებოდნენ და პრაქტიკულ გამოცდილებას უზიარებდნენ, რაც მნიშვნელოვან როლს თამაშობდა როგორც პროცესის მართვაში, ისე მონაწილეთა პროფესიულ განვითარებაში.

თიბისი კვლავ აგრძელებს ახალგაზრდების მხარდაჭერას და განაგრძობს ტექნოლოგიური განათლების ხელშეწყობას მთელი ქვეყნის მასშტაბით. კომპანიას სჯერა, რომ მსგავსი ინიციატივები ქმნის მყარ საფუძველს ახალგაზრდებისთვის, რომლებიც მომავალში ტექნოლოგიური სექტორის განვითარებაში მნიშვნელოვან როლს შეასრულებენ.