უზენაესმა სასამართლომ ბათუმელებისა და ნეტგაზეთის დამფუძნებლის, მზია ამაღლობელის საჩივარი არ დააკმაყოფილა. უზენაესი სასამართლოს ამ გადაწყვეტილებით მზია ამაღლობელის საქმეზე სასამართლო დავა დასრულდა და მისი საქართველოში გასაჩივრება აღარ არის შესაძლებელი.

მზია ამაღლობელის ადვოკატებმა უზენაეს სასამართლოში ქუთაისის სააპელაციო სასამართლოს გადაწყვეტილება გაასაჩივრეს, რომლის მიხედვითაც ამაღლობელისთვის მისჯილი 2-წლიანი თავისუფლების აღკვეთა ძალაში დარჩა. უზენაეს სასამართლოში საქმის პროკურორი თორნიკე გოგეშვილი მზია ამაღლობელისთვის დანაშაულის დამძიმებას მოითხოვდა.

უზენაეს სასამართლოში საჩივრის არ დაკმაყოფილება ნიშნავს, რომ სასამართლო საერთოდ არ განიხილავს საქმეს. "ნეტგაზეთის" ინფორმაციით, გადაწყვეტილება უზენაესი სასამართლოს პალატის წევრებმა ლევან თევზაძემ, მერაბ გაბინაშვილმა და მამუკა ვასაძემ მიიღეს. საჩივარი ზეპირსიტყვიერად განიხილეს და მას მზია ამაღლობელის მხარე არ ესწრებოდა.

2026 წლის 12 იანვარს ერთი წელი შესრულდება დამოუკიდებელი გამოცემების – ბათუმელებისა და ნეტგაზეთის დამფუძნებლის, ჟურნალისტ მზია ამაღლობელის დაპატიმრებიდან. მზია ამაღლობელი, საბჭოთა კავშირის დაშლის შემდეგ, პირველი პოლიტიკური პატიმარი ჟურნალისტი ქალია საქართველოში. იგი 2025 წლის 11-12 იანვრის ღამეს, ქალაქ ბათუმში მიმდინარე საპროტესტო აქციაზე, ორჯერ დააკავეს. თავდაპირველად დააპატიმრეს ბათუმის პოლიციის სამმართველოს დამხმარე სათავსოს კედელზე საპროტესტო სტიკერის გაკვრისათვის, რომელზეც ეწერა — "იფიცება საქართველო". ეს სტიკერი პოლიციელებმა გაკვრისთანავე მოხსნეს. დაკავებიდან რამდენიმე საათში, მზია ამაღლობელი ხელწერილის საფუძველზე გაათავისუფლეს, თუმცა, მალევე კვლავ დააკავეს ბათუმის პოლიციის უფროსის — ირაკლი დგებუაძისთვის — სილის გაწვნისთვის.

ჟურნალისტის წინააღმდეგ გამოძიება დაიწყო სისხლის სამართლის კოდექსის 353 პრიმა მუხლის პირველი ნაწილით. მზია ამაღლობელს აღკვეთის ღონისძიების სახით წინასწარი პატიმრობა ჰქონდა შეფარდებული. 2025 წლის 6 აგვისტოს ბათუმის საქალაქო სასამართლოს მოსამართლე ნინო სახელაშვილმა მზია ამაღლობელს ბრალი გადაუკვალიფიცირა სისხლის სამართლის 353-ე მუხლის პირველი ნაწილით და 2-წლით თავისუფლების აღკვეთა მიუსაჯა.