ოცნების ხელისუფლების მთავრობის გადაწყვეტილებით, პოტენციურად მომეტებული რისკის ძაღლის, აგრეთვე სხვა ჯიშის ძაღლის ჰიპერპოპულაციის მართვის მიზნით, ძაღლების მოშენებაზე მორატორიუმი წესდება. ამის შესახებ ოცნების ხელისუფლების მთავრობის 27 თებერვლით დათარიღებულ დადგენილებაში წერია, რომელსაც ხელს ოცნების პრემიერი, ირაკლი კობახიძე აწერს.

დადგენილების მიხედვით, მორატორიუმი ცხადდება შემდეგი ჯიშის ძაღლების მოშენებაზე:

ამერიკული პიტ ბულ ტერიერი;

ფილა ბრაზილეირო;

სტაფორდშირის ტერიერი;

არგენტინული დოგი;

ტოსა ინუ;

კანე კორსო;

სტაფორდშირ ბულ ტერიერი;

ჰასკი;

მალამუტი;

ლაიკა.

მორატორიუმის მოქმედების პერიოდში მორატორიუმზე კონტროლს განახორციელებენ სსიპ − სურსათის ეროვნული სააგენტო და მუნიციპალიტეტების უფლებამოსილი ორგანოები.

დადგენილება ამოქმედდება 1 ივლისიდან 2026 წლის და ძალაშია 3 წელი.