სახალხო დამცველის განცხადებით, მონიტორინგის შედეგებით დადგინდა, რომ ხშირია ბავშვის მიმართ, როგორც ფსიქოლოგიური, ისე ფიზიკური ძალადობის შემთხვევები.

დღეს, 17 ოქტომბერს, საქართველოს სახალხო დამცველმა მოსწავლეთა მიმართ ძალადობის კუთხით არსებული მდგომარეობის შესახებ სპეციალური ანგარიში წარმოადგინა. ანგარიში გაეროს ბავშვთა ფონდის (UNICEF) მიერ მხარდაჭერილი პროექტის სახალხო დამცველის აპარატის ბავშვის უფლებების ცენტრის გაძლიერების ფარგლებში ჩატარდა.

კვლევის თანახმად, მოსწავლეთა 13,2 პროცენტი და სკოლის თანამშრომელთა 4 პროცენტი ბავშვის მიმართ ძალადობად არ მიიჩნევს ცემას, მოსწავლეთა 37 პროცენტი და სკოლის თანამშრომელთა 12,7 პროცენტი ბავშვის მიმართ ძალადობად არ მიიჩნევს წამორტყმას, ყურის აწევა ძალადობად არ მიაჩნია მოსწავლეთა 42,5 პროცენტს და სკოლის თანამშრომელთა 13,9 პროცენტს.

ანგარიშში საუბარია იმაზე, რომ სუსტია მოსწავლეთა ცოდნა თავიანთი უფლებებისა თუ ძალადობის სხვადასხვა ფორმების შესახებ, ამასთან, დაბალია პასუხისმგებელ პირთა კომპეტენცია ბავშვის მიმართ ნებისმიერი სახის ძალადობაზე რეაგირების მექანიზმთან დაკავშირებით.

მონიტორინგმა გამოავლინა, რომ სკოლის თანამშრომელთა შორის დაბალია ბავშვთა მიმართ ძალადობის შემთხვევებზე რეაგირების მექანიზმის ცოდნა.

ომბუდსმენი აღნიშნავს, რომ საქართველოს მთავრობის დადგენილება, ბავშვთა დაცვის მიმართვიანობის (რეფერირების) პროცედურების დამტკიცების თაობაზე, როგორც აღნიშნულ შემთხვევებზე რეაგირების სამოქმედო მექანიზმი, რესპონდენტთა მხოლოდ 2,8 პროცენტმა დაასახელა.

ბავშვის უფლებების ცენტრმა 2016–2017 სასწავლო წლის განმავლობაში მთელი საქართველოს მასშტაბით 109 ზოგადსაგანმანათლებლო დაწესებულება, მათგან 98 საჯარო სკოლა, 5 კერძო და 6 სკოლა-პანსიონი შეამოწმა.