ევროსაბჭო სამართლებრივ ჩარჩოზე შეთანხმდა, რომლის მიხედვითაც უკრაინას 2026-2027 წლისთვის €90 მილიარდის ოდენობის სესხს გამოუყოფს. ამის შესახებ ევროსაბჭო ოფიციალურ ვებგვერდზე წერს.

მათი განმარტებით, ახლა საბჭო მიზნად ისახავს ევროპარლამენტთან სწრაფ შეთანხმებას, რათა პირველი გადახდა ამ წლის მეორე კვარტლის დასაწყისში მოხდეს.

ევროსაბჭოს თქმით, უკრაინის მხარდამჭერი სესხი ქვეყანას დაეხმარება მისი გადაუდებელი ფინანსური საჭიროებების დაკმაყოფილებაში, რადგან რუსეთი აგრესიულ ომს აგრძელებს. ამ მიზნით, ის კონკრეტულად უკრაინის საერთო ბიუჯეტისა და თავდაცვის საჭიროებებს დააფინანსებს.

სესხი ევროკავშირის მიერ კაპიტალის ბაზრებზე აღებული სესხების მეშვეობით დაფინანსდება და უზრუნველყოფილი იქნება ევროკავშირის ბიუჯეტით. სესხების დაბრუნება მხოლოდ მას შემდეგ დაიწყება, რაც რუსეთი უკრაინისთვის ომის რეპარაციებს გადაიხდის.

გადაწყვეტილება გაძლიერებული თანამშრომლობის პროცედურით, 24 წევრი სახელმწიფოს მონაწილეობით მიიღეს.