აზერბაიჯანის სახელმწიფო ენერგეტიკული კომპანია SOCAR გაზის მიწოდებას ავსტრიასა და გერმანიაში დაიწყებს, რის შედეგადაც აზერბაიჯანული გაზის შემსყიდველი ქვეყნების რაოდენობა 16-მდე გაიზრდება, — ამის შესახებ კომპანიის წარმომადგენლებმა პროსამთავრობო მედიასაშუალება APA-ს განუცხადეს.

გაზი აღნიშნულ ქვეყნებში იტალიის გავლით, უკვე არსებული მარშრუტით გადაიზიდება. იტალია ისტორიულად ევროკავშირში აზერბაიჯანული გაზის ყველაზე მსხვილი შემსყიდველი ქვეყანაა.

APA-ს ცნობით, მიწოდება ტრანსადრიატიკული გაზსადენის (TAP) მეშვეობით მოხდება, რომელიც 2020 წელს ამოქმედდა და თურქეთიდან იტალიის სამხრეთ ნაწილამდეა გადაჭიმული.

APA-ს ავსტრიასა და გერმანიისთვის მიწოდებული გაზის მოცულობა, ასევე კონკრეტული შემსყიდველი კომპანიები არ დაუკონკრეტებია.

რუსულ ენერგორესურსებზე დამოკიდებულების შემცირების მცდელობის ფარგლებში ევროკავშირი სულ უფრო მეტად მიმართავს აზერბაიჯანს. თუმცა არსებობს შიში, რომ აზერბაიჯანი კვლავ მონაწილეობს რუსული წიაღისეული საწვავის "გათეთრებაში", რათა იგი ევროპულ ბაზარზე გაიყიდოს.

მანამდე, 2025 წლის მაისში, გაერთიანებულმა სამეფომ, როგორც რუსეთის ნავთობპროდუქტების "ჩრდილოვანი ფლოტის" სავაჭრო საქმიანობის შეზღუდვის მცდელობის ფარგლებში, აზერბაიჯანის სახელმწიფოს კუთვნილ ტანკერს სანქციები დაუწესა.

ორგანიზებული დანაშაულისა და კორუფციის გაშუქების პროექტის (OCCRP) მიერ ჩატარებულმა გამოძიებამ დაადგინა, რომ აღნიშნული გემი — Zangazur — Azerbaijan Caspian Shipping Company-ს ეკუთვნოდა, რომლის აქციების 100% აზერბაიჯანის მთავრობას ეკუთვნის.

2025 წლის სექტემბერში ევროკავშირის საგარეო საქმეთა სპიკერმა ანიტა ჰიპერმა OC Media-ს დაუდასტურა, რომ ევროკავშირის მიერ რუსეთის წინააღმდეგ დაწესებული სანქციები თურქეთში მდებარე STAR-ის ნავთობგადამამუშავებელ ქარხანაზეც გავრცელდა, რომელიც, რუსული ნედლი ნავთობის გადამუშავებაში მისი მონაწილეობის გამო, SOCAR-ისა და აზერბაიჯანის მთავრობის თანასაკუთრებაშია.

იმავე წლის ბოლოს, Reuters-მა წყაროებზე დაყრდნობით გაავრცელა ინფორმაცია, რომ STAR-ის ნავთობგადამამუშავებელმა ქარხანამ რუსული ნავთობის შესყიდვის ეტაპობრივი შეწყვეტა დაიწყო.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.