დანიის პრემიერმინისტრმა, მეტე ფრედერიქსენმა დონალდ ტრამპს მოუწოდა, გრენლანდიის მიტაცებაზე მუქარა შეწყვიტოს და დასძინა, რომ "აშშ-ის ამის უფლება არ აქვს".

"სრულიად არ აქვს აზრი იმის განხილვას, რომ შეერთებულმა შტატებმა გრენლანდია უნდა აიღოს. აშშ-ს არ აქვს უფლება დაიმკვიდროს ადგილი დანიის სამეფოს სამ ქვეყანაში," — განაცხადა პრემიერმინისტრმა.

ფრედერიქსენმა ასევე დასძინა, რომ "დანია და შესაბამისად გრენლანდიაც NATO-ს წევრია და ალიანსის უსაფრთხოების გარანტიით სარგებლობს. დანიას უკვე ჰქონდა თავდაცვის შეთანხმება აშშ-თან, რომელიც ქვეყნისთვის გრენლანდიაში წვდომას უზრუნველყოფდა, ასევე დანია გაზრდილ ინვესტიციებს აკეთებდა არქტიკის რეგიონში უსაფრთხოების მიმართულებით".

"ამიტომ მკაცრად მოვუწოდებ შეერთებულ შტატებს, რომ შეწყვიტონ მუქარები ისტორიულად ახლო მოკავშირესთან და სხვა ქვეყანასთან მიმართებით, რომლის ხალხმაც უკვე მკაფიოდ განაცხადა, რომ ისინი არ იყიდებიან," — თქვა ფრედერიქსენმა.

შეგახსენებთ, ტრამპმა The Atlantic-ის ჟურნალისტ მაიკლ შერერთან საუბრისას განაცხადა, რომ ვენესუელა შესაძლოა არ იყოს უკანასკნელი ქვეყანა, სადაც ამერიკული ჩარევა განხორციელდება.

"ჩვენ გრენლანდია გვჭირდება, აბსოლუტურად", — თქვა ტრამპმა და დასძინა, რომ კუნძული "რუსული და ჩინური გემებითაა გარშემორტყმული". ამავდროულად, აშშ-ის პრეზიდენტმა განაცხადა, რომ "სხვებს მოუწევთ გადაწყვიტონ, რას ნიშნავს აშშ-ის სამხედრო მოქმედება ვენესუელაში გრენლანდიისთვის".