საქართველოს პრეზიდენტის საპარლამენტო მდივანმა, ანა დოლიძემ დღეს საქართველოს პარლამენტის რიგგარეშე სხდომაზე საქართველოს კონსტიტუციის პროექტის მოტივირებული შენიშვნები წარადგინა.

ანა დოლიძის თქმით, ეს არ არის მხოლოდ პრეზიდენტის დოკუმენტი და მას "ორი მშობელი" ჰყავს ქართული ოცნება და ოპოზიციური პარტიები:

"მოტივირებულ შენიშვნებს ჰყავს ორი მშობელი: ერთი ქართული ოცნება, რომლის მიერაცაა ინიცირებული, შექმნილი, ან საერთაშორისო ვალდებულებად აღებული პირველი ხუთი საკითხი. მეორე მშობელი - ოპოზიციური პარტიები არიან.

მისი განმარტებით, ოპოზიციური პარტიები შეთანხმდნენ, რომ საქართველოს კონსტიტუციას შესძინონ "თანხმობის დოკუმენტი ელფერი" და "გადაარჩინონ ის ერთპარტიული დოკუმენტის სტატუსისაგან".

საპარლამენტო მდივნის განცხადებით, ეს ვეტო არის არა გაყოფის, არამედ კონსენსუსისა და თანხმობის ვეტოა. მისივე თქმით, დღეს კონსტიტუცია მიღებულია მხოლოდ ერთი პარტიის მხარდაჭერით და მას აქვს მხოლოდ ერთი პარტიის "კუთვნილება", ხოლო პრეზიდენტი ამ ვითარებიდან გამოსავალს გვთავაზობს:

"ეს ისტორიული ვითარება იძლევა შანსს, რომ ერთპარტიული კუთვნილებიდან კონსტიტუცია გადაიქცეს მთელი პოლიტიკური სპექტრის, საქართველოს ამომრჩევლების კონსტიტუციად".

დოლიძის თქმით, ქართულის ოცნების "ოცნება" იყო, რომ 2020 წელს საარჩევნო სისტემა მთლიანად პროპორციულზე გადასულიყო და ამ ცვლილების გადადება "სამართლიანი საარჩევნო სისტემის" დამკვიდრების გაშვებული შესაძლებლობაა:

"არსებობს შესაძლებლობა, რომ ქართულმა ოცნებამ გადადგას ისტორიული ნაბიჯი და ძალაში შეიყვანოს და განახორციელოს საკუთარი ოცნება და საქართველო გადაიყვანოს დემოკრატიული განვითარების პრინციპულად ახალ ეტაპზე. ამას უზრუნველყოფს ოპოზიციის მხარდაჭერა, რომელიც, როგორც რეალური ნაბიჯი უზრუნველყოფს საკუთარი ხმების მხარდაჭერას ამ პროექტისათვის".

გამოსვლის დასასრულს ანა დოლიძემ პრეზიდენტის არჩევის წესზეც ისაუბრა და აღნიშნა, რომ ქართველ ხალხს უნდა ჰქონდეს უფლება თავად გადაწყვიტოს ვინ იქნება ქვეყნის პრეზიდენტი.

9 ოქტომბერს პრეზიდენტმა გიორგი მარგველაშვილმა მესამე მოსმენით მიღებულ კონსტიტუციის პროექტს ვეტო დაადო. ეს პრეზიდენტის რიგით მეათე ვეტოა.

გიორგი მარგველაშვილის განცხადებით, ექვსი შენიშვნიდან პირველი ოთხი საკითხი არის ის ვალდებულებები, რომლებიც ქართულმა ოცნებამ ვენეციის კომისიისგან აიღო. ესენია: ბონუსის, ბლოკების, საკონსტიტუციო სასამართლოსა და აღმსარებლობის თავისუფლების საკითხები. მეხუთე საკითხი ეხება 2020 წელს პროპორციულ საარჩევნო სისტემაზე გადასვლას, ხოლო მეექვსე - პრეზიდენტის არჩევის წესს, რომლის განხილვაც მან სამომავლოდ, ორპალატიანი სისტემის შემოღების დროისთვის გადადო.

გუშინ, პარლამენტის იურიდიულმა კომიტეტმა პრეზიდენტის მოტივირებულ შენიშვნებს მხარი არ დაუჭირა.