ოკუპირებული ცხინვალის საქალაქო სასამართლომ სამოქალაქო აქტივისტ თამარა მეარაყიშვილს ორთვიანი წინასწარი პატიმრობა შეუფარდა, ამის შესახებ მისმა ადვოკატმა, ალან ბაზაევმა განაცხადა. მედიასაშუალება "საპას" ცნობით, ის გადაწყვეტილების გასაჩივრებას აპირებს.

მათი ცნობით, "თამარას მიერ სოციალურ მედიაში გამოქვეყნებულ ერთ-ერთ ფოტოზე უსაფრთხოების სამსახურის აგენტებმა სტრატეგიული ობიექტი შენიშნეს". მეარაყიშვილს "საქართველოს სასარგებლოდ ჯაშუშობაში" ადანაშაულებენ.

"ეხო კავკაზას" ცნობით, სასამართლო პროცესი დახურულ კარს მიღმა გაიმართა — არც ჟურნალისტები და არც ბრალდებულის ოჯახის წევრები სასამართლო დარბაზში არ შეუშვეს. მის მშობლებს თამარას ნახვის უფლება არ მისცეს. გამოცემა წერს, რომ ქალის დედა დიაბეტით არის დაავადებული. მეარაყიშვილი უარყოფს თავის დანაშაულს და აგრძელებს წინა დღით დაწყებულ შიმშილობას. მედიკამენტების მიღებისას ის მხოლოდ წყალს სვამს.

თამარ მეარაყიშილის მშობლები

თამარ მეარაყიშილის მშობლები

ფოტო: Cana

დაპატიმრებამდე მეარაყიშვილმა სოციალურ ქსელში ცხინვალის ცენტრში საპროტესტო აქცია დააანონსა და თვითგამოცხადებული სამხრეთ ოსეთის რესპუბლიკის პრეზიდენტ ალან გაგლოევთან შეხვედრა მოითხოვა.

სამხრეთ ოსეთის სოციალური მედიის მომხმარებლები დარწმუნებულები არიან, რომ მეარაყიშვილის წინააღმდეგ წაყენებული ბრალდებები შეთითხნილია. დაკავების შესახებ ინფორმაცია დაადასტურა საქართველოს სახელმწიფო უსაფრთხოების სამსახურმა, რომელმაც განაცხადა, რომ "ამ საკითხთან დაკავშირებით ინტენსიური კომუნიკაცია მიმდინარეობს".