საქართველოს ფინანსთა მინისტრის, დიმიტრი ქუმსიშვილის თქმით, საქართველოში ბოლო ოთხ წელში თამბაქოს მოხმარება 25 პროცენტით შემცირდა. ამავე პერიოდში კი საბიუჯეტო შემოსავალი თამბაქოს აქციზით დაბეგვრიდან 150 პროცენტით გაიზარდა.

ქუმსიშვილმა აღნიშნა, რომ საქართველოში 2013 წლიდან აქციზის განაკვეთები თამბაქოს ნაწარმზე ზრდადია და ბოლო ოთხი წლის განმავლობაში ხუთჯერ მოიმატა.

როგორც ფინანსთა სამინისტროს პრესსამსახურში აღნიშნავენ, თამბაქოსთან დაკავშირებულ სესიაზე მინისტრმა აღნიშნა, რომ საქართველოში მიღებული კანონი პრობლემის კომპლექსურად მოგვარების შესაძლებლობას იძლევა.

"საუბარია არა მხოლოდ აქციზის განაკვეთის ზრდასა და სხვა ფისკალურ მეთოდებზე, რომელმაც ქვეყანაში თამბაქოს მოხმარების შემცირებას ხელი უნდა შეუწყოს, არამედ ისეთ აქტივობებზე, როგორიცაა თამბაქოს ნაწარმის ყველა სახის რეკლამის შეზღუდვა, აღნიშნული პროდუქციის შეფუთვასთან დაკავშირებული საკითხები, აგრეთვე იმ ადგილების შეზღუდვა, სადაც მოწევაა შესაძლებელი და სხვა", - ამბობენ ფინანსთა სამინისტროს პრესსამსახურში.