პირველი ვიცე-პრემიერი, ფინანსთა მინისტრი დიმიტრი ქუმსიშვილი კონგრესმენ ჯონ მოოლენაარს შეხვდა.

შეხვედრაზე, რომელიც პირველი ვიცე-პრემიერის აშშ-ში სამუშაო ვიზიტის ფარგლებში, გაიმართა, საუბარი წარიმართა აშშ-სა და საქართველოს შორის ურთიერთობების ფართო სპექტრზე, მათ შორის, სავაჭრო-ეკონომიკური თანამშრომლობის გაღრმავების მიმართულებით.

კონგრესმენმა ჯონ მოოლენაარმა საქართველოს სუვერენიტეტისა და ტერიტორიული მთლიანობისადმი, ქვეყნის ევროატლანტიკურ სტრუქტურებში ინტეგრაციისა და გატარებული დემოკრატიული რეფორმებისადმი მტკიცე მხარდაჭერა გამოხატა.

შეხვედრაზე დიმიტრი ქუმსიშვილმა განსაკუთრებით აღნიშნა ის დიდი მხარდაჭერა, რომელსაც აშშ იჩენს საქართველოს მიმართა და იმედი გამოთქვა, რომ თანამშრომლობა სხვადასხვა სტრატეგიული მიმართულებით სამომავლოდ კიდევ უფრო განვითარდება. პირველმა ვიცე-პრემიერმა კონგრესმენს გააცნო საქართველოში მიმდინარე რეფორმები, რომელიც ხორციელდება მთავრობის ოთხპუნქტიანი გეგმიდან გამომდინარე და მისი პრიორიტეტული მიმართულებები, აგრეთვე წარმატებული თანამშრომლობა საერთაშორისო სავალუტო ფონდთან, რომლის პროგრამაც საქართველოს მთავრობის რეფორმების გეგმის პრიორიტეტებს ეფუძნება.

შეხვედრაში მონაწილეობა მიიღო საქართველოს ელჩმა აშშ-ში დავით ბაქრაძემ.

ვიზიტის ფარგლებში, პირველი ვიცე-პრემიერი დიმიტრი ქუმსიშვილი მონაწილეობას მიიღებს საერთაშორისო სავალუტო ფონდისა და მსოფლიო ბანკის წლიური შეხვედრების დღის წესრიგით გათვალისწინებულ რამდენიმე მნიშვნელოვან დისკუსიაში, გარდა ამისა, ის გამართავს შეხვედრებს როგორც აღნიშნული საერთაშორისო საფინანსო ორგანიზაციებს, აგრეთვე დონორებისა და საინვესტიციო კომპანიების წარმომადგენლებთან და აშშ-ის კონგრესის წევრებთან.