ოცნების პარლამენტის ვიცესპიკერმა, თეა წულუკიანმა სამთავრობო ტელეკომპანია "იმედის" ეთერში მისთვის დაწესებულ სანქციებზე ისაუბრა. წულუკიანის აზრით, მას "არაფერი დაუშავებია" და სანქციები "განსხვავებული აზრისთვის" დაუწესეს.

"მე ვარ დასანქცირებული. ჩავთვალოთ, რომ მე დღეს არ მიკეთია ბროში, მაგრამ რომ მიკეთია, მის მაგივრად მიკეთია ყვითელი ვარსკვლავი. თუ ჩავთვლი, რომ სანქცია არის ჩემთვის ყვითელი ვარსკვლავი, რომ ვარ მე მიუღებელი.

რატომ ვარ მიუღებელი?! მე ხომ არაფერი დამიშავებია?! იმიტომ ვარ მიუღებელი, რომ მე ვარ განსხვავებული, მე მაქვს განსხვავებული აზრი, რომ არ გეთანხმები, გაკრიტიკებ, რომ მე ისეთი რიტორიკა მაქვს, რომელიც შენ გაწუხებს. გეუბნები, რომ მე, ევროპელი, ქართველი, რომელიც შენთან ერთად გავიზარდე, ერთ ევროპაში, ერთ ღირებულებებით, მე დღეს ვფიქრობ, რომ რაღაც არ არის კარგად, ორგანიზმში არის ვირუსი და შენ ეს არ მოგწონს და მომაკარი იარლიყი სანქციის სახით.

მე და საქართველოს ჩემნაირი მოქალაქეები ყველაფერს ავიტანთ იმიტომ, რომ ვიცით, რისთვის კეთდება ეს,"— განაცხადა თეა წულუკიანმა.

ეს არ არის პირველი შემთხვევა, როდესაც ოცნების პარლამენტის ვიცესპიკერმა უკმაყოფილება გამოთქვა სანქციების გამო. 10 ივნისს, სახალხო დამცველმა, ლევან იოსელიანმა ოცნების პარლამენტში ანგარიში წარადგინა, რომელშიც 2024 წელს საპროტესტო აქციებზე გამოვლენილ დარღვევებზე იყო საუბარი. საპასუხოდ თეა წულუკიანმა სახალხო დამცველს უსაყვედურა, რომ მას ქართული ოცნების წარმომადგენლების და მათი ოჯახის წევრების უფლებების დაცვა "რცხვენია".

შეგახსენებთ, 2024 წლის დეკემბერში, ესტონეთმა სანქციები დაუწესა ქართველ მაღალჩინოსნებს, მათ შორის თეა წულუკიანს.