14 დეკემბერს, ქუთაისში არასამთავრობო ორგანიზაციის "საინფორმაციო ცენტრი NATO-სა და ევროკავშირის შესახებ" ოფიციალური გახსნის ცერემონია გაიმართა. ორგანიზაცია 4 ივნისს გაუქმებული სახელმწიფო უწყების თვისებები შეითავსებს — საინფორმაციო ცენტრი NATO-სა და ევროკავშირის შესახებ გაუქმდა და ცენტრი რეორგანიზაციის შედეგად ოცნების საგარეო საქმეთა სამინისტროს შეუერთდა.

ორგანიზაცია მარიკა ვაჭარაძემ დააფუძნა, რომელიც წლები მუშაობდა აღნიშნულ ცენტრში. ცენტრის განცხადებაში ვკითხულობთ, რომ ახალი ცენტრის დაფუძნების თარიღი სიმბოლურად 28 ნოემბერია — დღე როდესაც ერთი წლის წინ ირაკლი კობახიძემ საქართველოს ევროკავშირთან ინტეგრაციის პროცესის შეჩერება გამოცხადდა. თავდაპირველად, ცენტრის მთავარი მიზანი საზოგადოებისთვის NATO-თან დაკავშირებულ თემებზე ინფორმაციის მიწოდება იყო, შემდეგ ცენტრს ევროკავშირთან დაკავშირებულ საკითხებზე საზოგადოებისთვის ინფორმაციის მიწოდებაც დაევალათ.

ორგანიზაციის ინფორმაციით, შეხვედრაზე გაიმართა ორი პანელური დისკუსია, რომელიც NATO-თან და ევროკავშირთან ინტეგრაციის პროცესში არსებულ გამოწვევებს ეხებოდა. დისკუსიის დროს დაიფარა უვიზო მიმოსვლის, ნეიტრალიტეტის და დეზინფორმაციული ნარატივების საკითხები.

"ჩვენი მთავარი მისიაა მოქალაქეებს მივაწოდოთ ნატოსა და ევროკავშირის შესახებ რეალური, ფაქტებზე დაფუძნებული ინფორმაცია, რომლებმაც განსაზღვრა ევროპის ქვეყნების უსაფრთხოება, განვითარება და თავისუფლება. ჩვენ გვჯერა, რომ ქვეყნის ევროატლანტიკური მომავალი მხოლოდ პოლიტიკური ელიტის გადასაწყვეტი არ არის. ეს არის მთელი საზოგადოების არჩევანი — არჩევანი, რომელიც დგას ინფორმირებულობაზე, ცნობიერებაზე და პასუხისმგებლობაზე. ჩვენ არ ვქმნით პოლიტიკურ გზავნილებს, ჩვენ ვქმნით ცოდნას! და სწორედ ამიტომ, ჩვენი საქმიანობა განსაკუთრებულად მნიშვნელოვანია დღეს, როცა საქართველოში ქვეყნის ევროპულ მომავალზე გაჩნდა კითხვები და გაურკვევლობა. ჩვენი კარები ღიაა ყველასთვის — საქართველოს ყველა მოქალაქისთვის, როგორც ქვეყნის შიგნით, ისე მის გარეთ, მათ შორის ოკუპირებულ ტერიტორიებზე მცხოვრები ჩვენი თანამოქალაქეებისთვის," — ვკითხულობთ ცენტრის განცხადებაში.