"თბილისის საქალაქო სასამართლომ დააკმაყოფილა მერიის კომპანიიდან გათავისუფლებული ლ.ა.-ს სარჩელი, უკანონოდ ცნო მისი სამსახურიდან გათავისუფლებას და მოპასუხე მხარეს განაცდურის და კომპენსაციის ანაზღაურება დაავალა," — ამის შესახებ ინფორმაციას "სოციალური სამართლიანობის ცენტრი" ავრცელებს.

ცენტრის ინფორმაციით, ლ.ა. 2016-დან 2025 წლის აპრილამდე დასაქმებული იყო შპს "თბილსერვის ჯგუფში", ბოლოს საწყობების მართვის დეპარტამენტში. დაზარალებული "10 წლის განმავლობაში კეთილსინდისიერად ასრულებდა მასზე დაკისრებულ მოვალეობებს, ამ ხნის განმავლობაში დააწინაურეს და ხელფასიც გაუზარდეს, არასოდეს ყოფილა დისციპლინირებული შესრულებული სამუშაოს ხარვეზიანობის გამო". განცახდებაში ვკითხულობთ, რომ 31 მარტის ბრძანებით ლ.ა. სამსახურიდან "დაკავებულ პოზიციასთან კვალიფიკაციის შეუსაბამობის მიზეზით" გაათავისუფლეს. ცენტრის განცხადებით, დაზარალებული რეალურად პოლიტიკური ნიშნით გაათავისუფლეს.

"სინამდვილეში, როგორც საქმის გარემოებებიდან იკვეთება, შპს „თბილსერვის ჯგუფმაც“ მიმდინარე წლის მარტში, რეორგანიზაცია ჩაატარა ევროკავშირში გაწევრიანების შესახებ მოლაპარაკებების შეჩერების თაობაზე გადაწყვეტილების მიმართ გამოხატული პროტესტის საპასუხოდ, ქართული ოცნების მიერ საჯარო სამსახურში განხორციელებული საკადრო წმენდის ფარგლებში," — ვკითხულობთ განცხადებაში.

2025 წლის 9 დეკემბერს თბილისის საქალაქო სასამართლომ ლ.ა.-ს სარჩელი დააკმაყოფილა და შპს "თბილსერვის ჯგუფს" გათავისუფლების დღიდან გადაწყვეტილების აღსრულებამდე ყოველთვიურად დაუბეგრავი 1829 ლარის ოდენობით, აგრეთვე — სამსახურში აღდგენის ნაცვლად, კომპენსაცია 1 თვის ხელფასის ოდენობით გადახდა დაევალა.