საპროტესტო მოძრაობამ "300 ქალი" დღეს პროკურატურას მიმართა და სამასზე მეტი ქალის ხელმოწერით ითხოვენ, რომ ნინო დათაშვილის მიმართ გამოყენებულ იქნას გირაო.

"ქალთა საპროტესტო მოძრაობა "300 ქალის" წევრები მოვითხოვთ პატიმარ ნინო დათაშვილის წინასწარი პატიმრობიდან სასწრაფო გათავისუფლებას, მისი ჯანმრთელობის მდგომარეობის გაუარესების გამო. ქალთა მოძრაობის წევრები მივიჩნევთ, რომ ნინო დათაშვილის პატიმრობაში ყოფნა მის მიმართ არაადამიანურ მოპყრობას უთანაბრდება, რის გამოც მოვითხოვთ შეფარდებული აღკვეთის ღონისძიება პატიმრობა შეიცვალოს უფრო მსუბუქი აღკვეთის ღონისძიებით და ნინო დათაშვილის მიმართ გამოყენებულ იქნას გირაო.

გარდა ზემოთ აღნიშნულისა, ნინო დათაშვილისადმი უმკაცრესი აღკვეთის ღონისძიების გამოყენება მიუთითებს არა მხოლოდ ინდივიდუალურ უსამართლობაზე, არამედ აღრმავებს სისტემურ უთანასწორობას ქალთა მიმართ, რომლებიც ხშირად ხდებიან პოლიტიკური და სოციალური დევნის მსხვერპლი. სახელმწიფოს ვალდებულებაა უზრუნველყოს ქალთა უფლებების დაცვა, მათ შორის სამართლიანი მართლმსაჯულების, ჯანმრთელობისა და ღირსების დაცვის უფლება.

იმ შემთხვევაში, თუ ნინო დათაშვილს არ შეეცვლება აღმკვეთი ღონისძიების ფორმა და სასწრაფოდ არ გათავისუფლდება პატიმრობიდან, ჩვენ მივმართავთ ქალთა უფლებების დამცველ საერთაშორისო ორგანიზაციებს, როგორც საქართველოში, ისე ევროპასა და ამერიკის შეერთებულ შტატებში", — ნათქვამია პროკურატურისადმი მიმართვაში.

სამოქალაქო განათლების მასწავლებელ ნინო დათაშვილს მიმდინარე წლის 9 ივნისს სასამართლოს მანდატურზე თავდასხმას ედავებიან. მას ბრალი სსკ-ს 353/2 მუხლის მე-3 ნაწილით აქვს წარდგენილი, რაც სამსახურებრივი მოვალეობის შესრულების დროს საჯარო მოსამსახურეზე ძალადობას გულისხმობს და 4-დან 7 წლამდე პატიმრობას ითვალისწინებს.

მეტი ნინო დათაშვილის საქმეზე: