26 ოქტომბრის საღამოს და 27 ოქტომბრის ღამით უკრაინამ მოსკოვის მიმართულებით სამ ათეულზე მეტი დრონი გაუშვა.

DW-ს ცნობით, ადგილობრივი მაცხოვრებლების თქმით, საჰაერო თავდაცვის სისტემები მუშაობდნენ კოლომნაში, ტროიცკში, კლიმოვსკში, პოდოლსკში, დომოდედოვოში, დუბნასა და რამენსკოეში. ჟუკოვსკში დრონის ჩამოვარდნის ადგილას ხანძარი გაჩნდა.

Telegram-ის არხმა Shot-მა გაავრცელა ინფორმაცია, რომ ტულას რეგიონში მოსკოვის მიმართულებით მიმავალი რამდენიმე დრონი ჩამოაგდეს. ტულას გუბერნატორი დიმიტრი მილაევი აცხადებს, რომ ღამით რეგიონის თავზე 32 დრონი მოიგერიეს.

27 ოქტომბრის დილით, რუსეთის თავდაცვის სამინისტრომ განაცხადა, რომ ღამით რუსეთის სხვადასხვა რეგიონში სულ 193 უკრაინული დრონი ჩამოაგდეს, მათ შორის 40 მოსკოვის ოლქში, რომელთაგან 34 მოსკოვის მიმართულებით მიფრინავდა.

DW წერს, რომ 26 ოქტომბრის შუადღისას, მოსკოვის მახლობლად, სერპუხოვში, ნავთობბაზას დრონებით თავდასხმის შედეგად ცეცხლი გაუჩნდა.

Telegram-ის არხმა Astra-მ გაავრცელა ინფორმაცია, რომ სერპუხოვის ნავთობბაზასთან ახლოს ხანძარი გაჩნდა. "სერპუხოვის ქალაქის ადმინისტრაციამ ადგილობრივ მედიას განუცხადა, რომ ცარიელი საწვავის ავზი იწვოდა და ხანძარი სწრაფად ჩააქრეს", — იტყობინება გამოცემა.

ფრენის უსაფრთხოების უზრუნველსაყოფად, 27 ოქტომბრის ღამეს ჟუკოვსკის და დომოდედოვოს აეროპორტებში თვითმფრინავების ჩამოსვლასა და გამგზავრებაზე დროებითი შეზღუდვები დაწესდა. ეს შეზღუდვები 27 ოქტომბერს, დილის 4:00 საათზე მოიხსნა. "როსავიაციის" ცნობით, ამ შეზღუდვების დროს ოთხი თვითმფრინავი ალტერნატიულ აეროდრომებზე გადამისამართდა.