სომხეთის ხელისუფლებამ გიუმრის მერი, ვარდან ღუკასიანი, კორუფციის ბრალდებით დააკავა მას შემდეგ, რაც ქალაქის მერიაში მთელი დღის განმავლობაში გაგრძელდა დაძაბული მდგომარეობა — პოლიციამ შენობა ალყაში მოაქცია და ღუკასიანის მხარდამჭერებს დაუპირისპირდა.

ანტიკორუფციული კომიტეტის ცნობით, ღუკასიანი და კიდევ შვიდი პირი ბრალდებულნი არიან ქრთამის მოთხოვნასა და მიღებაში. მათ შორისაა 4 მილიონი დრამის ($10,000) გადახდა არალეგალურად აშენებული ნაგებობის ლეგალიზებისთვის. გამოძიების თანახმად, ღუკასიანმა და ქალაქის მთავარმა არქიტექტორმა მოქალაქეს მოსთხოვეს თანხა იმის სანაცვლოდ, რომ 1,500 კვადრატული მეტრის უნებართვო მშენებლობა კანონიერად გადაეფორმებინათ — მათ დაჰპირდნენ, რომ ოფიციალურ დოკუმენტებში შენობა თითქოს დანგრეულად და ხელახლა აშენებულად ჩაიწერებოდა.

კომიტეტის განცხადებით, საქმე გამოაშკარავდა მასშტაბური ფარული ოპერაციების შედეგად, რომლებიც სისტემურ კორუფციასა და თანამდებობის ბოროტად გამოყენებაზე მიუთითებს. ოფიციალური პირების თქმით, სავარაუდო ქსელის წევრები ქალაქის საკრებულოს მათთვის არასასურველ წევრებს შანტაჟით ემუქრებოდნენ, რათა პოლიტიკური გავლენა შეენარჩუნებინათ.

გიუმრიში, სომხეთის მეორე უდიდეს ქალაქში, დაძაბულობა დილიდან დაიწყო — სამართალდამცველები მერიის შენობაში შევიდნენ და თანამშრომლებს შესვლა-გამოსვლა აუკრძალეს. მოგვიანებით ადგილზე სპეციალური დანიშნულების წითელბერეტიანი რაზმები ჩაიყვანეს, რადგან შენობის წინ მერის მხარდამჭერები შეიკრიბნენ. შეტაკებების შედეგად ერთი ადამიანი დააკავეს, რამდენიმე კი დაშავდა.

შუადღისას ღუკასიანი ცოტა ხნით გამოვიდა კაბინეტიდან და თანამშრომლებს მიმართა — "წავიდეთ, პრობლემა არ გვაქვს, არაფერი დაგვიშავებია". მოგვიანებით იგი დააკავეს და დაკითხვისთვის ერევანში გადაიყვანეს, რაც მისმა ადვოკატმაც დაადასტურა.

ღუკასიანის იურიდიული გუნდი აცხადებს, რომ ბრალდებები პოლიტიკურად მოტივირებულია. ადვოკატის, არამაის ჰაირაპეტიანის თქმით, ანტიკორუფციული კომიტეტის განცხადება მტკიცებულებებს არასწორად წარმოაჩენს და გამოქვეყნებულ ჩანაწერებში მერის პირდაპირი მონაწილეობა არ ჩანს.

"არც ერთ ჩანაწერში არ არსებობს ქრთამის თემა, რომელიც ვარდან ღუკასიანს უკავშირდება, ეს არის პოლიტიკური შოუ, რომელიც მმართველმა პარტიამ დადგა," — აღნიშნა ჰაირაპეტიანმა.

ანტიკორუფციულმა კომიტეტმა უარი თქვა კომენტარზე მის წინააღმდეგ გამოტანილი ბრალდებების შესახებ და მხოლოდ აღნიშნა, რომ გამოძიებამ გიუმრის მერიაში ქრთამის აღების, გამოძალვისა და ქონებრივი დოკუმენტების გაყალბების არაერთი შემთხვევა გამოავლინა.

ღუკასიანი ცოტა ხნის წინ მკვეთრად გააკრიტიკა პრემიერმინისტრი ნიკოლ ფაშინიანი და მისი მთავრობა სომხეთის სამოციქულო ეკლესიის წინააღმდეგ გადადგმული ნაბიჯების გამო. საპასუხოდ, ხელისუფლების წარმომადგენლებმა განაცხადეს, რომ თავად ღუკასიანის მიმართ დაიწყებოდა "კანონის გამკაცრებული გამოყენება".

ვარდან ღუკასიანი სომხეთის პოლიტიკაში ერთ-ერთი ყველაზე გავლენიანი და წინააღმდეგობრივი ფიგურაა. ის გიუმრის მერის თანამდებობას 1999-2012 წლებში იკავებდა, 2006-2017 წლებში კი რესპუბლიკური პარტიის წევრი იყო. მოგვიანებით პარლამენტში "კეთილდღეობანი სომხეთის" პარტიას წარმოადგენდა, ხოლო ბოლო ადგილობრივ არჩევნებში კომუნისტური პარტიის სახელით იყარა კენჭი. მისი გამარჯვება მმართველი "სამოქალაქო ხელშეკრულების" კანდიდატზე შეფასდა, როგორც ფაშინიანის პარტიის სერიოზული მარცხი 2026 წლის საპარლამენტო არჩევნების წინ.

არჩევნების შემდეგ ღუკასიანმა განაცხადა, რომ მხარს უჭერს რუსეთთან ერთიანი სახელმწიფოს შექმნის იდეას.

სტატიაში წარმოდგენილი შეხედულებები ეკუთვნის ავტორს და არ წარმოადგენს On.ge-ის პოზიციას. მასალა ქვეყნდება OC Media-სთან პარტნიორობის ფარგლებში, რომლის შედეგად, გამოცემის სტატიები ამიერიდან ოთხ ენაზე გავრცელდება. საქართველოში OC Media-ს პარტნიორი On.ge-ა. სტატია ინგლისურად შეგიძლიათ წაიკითხოთ აქ.