საქართველოს მართლმადიდებელი ეკლესიის საპატრიარქო ახალქალაქის რაიონის სოფელ კუმურდოში, მეათე საუკუნის ტაძრის ეზოში მომხდარ ინციდენტს გამოეხმაურა. საპატრიარქოს თქმით, ტაძრის წარმომავლობასთან გავრცელებული ინფორმაცია დეზინფორმაციაა:

"სომეხთა სამოციქულო ეკლესიის საქართველოს ეპარქია ადასტურებს, რომ ტაძარზე პრეტენზია არა აქვს და მას ქართულად მიიჩნევს."

საპატრიარქოს განცხადებაში ნათქვამია, რომ 5 ოქტომბერს გაიმართა შეხვედრა, რომელსაც შესაბამისი სახელმწიფო უწყებების, საქართველოს სამოციქულო მართლმადიდებელი ეკლესიისა და სომეხთა სამოციქულო ეკლესიის საქართველოს ეპარქიის წარმომადგენლები ესწრებოდნენ.

30 სექტემბერს, ახალქალაქის რაიონის სოფელ კუმურდოში ადგილობრივი მოსახლეობა კულტურული მემკვიდრეობის სტატუსის მქონე ეკლესიის ეზოში შესვლას აპირებდა. ადგილობრივების თქმით, მათ ეზოში სანთლების დანთება უნდოდათ. ასევე, ტაძრის ეზოში ტრადიციული სომხური ჯვრის - ხაჩკარის აღმართვას გეგმავდნენ.

იქიდან გამომდინარე, რომ ტაძარს სარესტავრაციო სამუშაოები უტარდებოდა დაცვის პოლიციამ ტერიტორიაზე არ შეუშვა, რასაც ფიზიკური დაპირისპირება მოჰყვა. ადგილზე ჩასული იყო შს მინისტრი გიორგი მღებრიშვილი.

ადგილობრივებმა განაცხადეს, რომ რესტავრატორები მათი წინაპრების საფლავებს არ უფრთხილდებიან და ჯვრის აღმართვას ითხოვენ:

"თუ არ მოგვცემენ ჯვრის დადგმის საშუალებას, აქ მოხდება ომი. რესტავრატორები ჩვენი წინაპრების ნეშტების პატივს არ სცემენ. ტომრებში ჩაყარეს ჩვენი ბაბუების და მამების ძვლები. საქართველოს მთავრობა არ გვაძლევს მემორიალის დადგმის უფლებას", - თარგმანი რუსთავი 2-მა გაავრცელა.

შსს-ის ინფორმაციით, დაპირისპირების შედეგად ოთხი პოლიციელი დაშავდა, ასევე დაზიანდა შსს-ს კუთვნილი რამდენიმე მანქანა.

უწყების თქმით, გამოძიება სისხლის სამართლის კოდექსის 353-ე პრიმა მუხლით (პოლიციისთვის წინააღმდეგობის გაწევა), 187-ე მუხლის 1-ლი ნაწილით (ნივთის დაზიანება ან განადგურება), სსკ-ს 239-ე მუხლის მე-2 და მე-3 ნაწილებით (ხულიგნობა) მიმდინარეობს.