სტრასბურგის სასამართლომ საქმის "მთივლიშვილი საქართველოს წინააღმდეგ" არსებითი განხილვა დაიწყო. ამის შესახებ ინფორმაციას ჟურნალისტი გელა მთივლიშვილი სოციალურ ქსელში ავრცელებს. მისი თქმით, საქმის არსებითი განხილვა ევროპული კონვენციის ოთხივე მუხლთან მიმართებით (მე-5, მე-6, მე-10, მე-18) დაიწყო.

"ესეც ასე! სტრასბურგის სასამართლოდან წერილობით გვაცნობეს, რომ ჩემი საქმის არსებითი განხილვა დაიწყო, ევროპული კონვენციის ოთხივე მუხლთან მიმართებით, რომელთა დარღვევაშიც საქართველოს მთავრობას, ამჟამად რეჟიმს ვადანაშაულებ.

— კონვენციის მე-5 მუხლი (თავისუფლებისა და უსაფრთხოების უფლება);

— მე-6 მუხლი (საქმის სამართლიანი განხილვის უფლება);

— მე-10 მუხლი (გამოხატვის თავისუფლება);

— მე-18 მუხლი (უფლებების შეზღუდვათა გამოყენების ფარგლები).

სადაც არ უნდა დააწინაუროთ მოძალადე პოლიციელები, აუცილებლად მოუწევთ პასუხისგება ჩემი უკანონოდ დაკავების, პოლიციის "მინივენში" ფიზიკური ძალადობის და პროფესიულ საქმიანობაში ხელის შეშლის გამო! რა დროც არ უნდა გავიდეს, ვერავინ გადაურჩება პასუხისმგებლობას, მაინც ამოვთხრი!", — დაწერა გელა მთივლიშვილმა.

ცნობისთვის, გელა მთივლიშვილი პოლიციამ 2024 წლის 23 იანვარს, თბილისში, კეკელიძის ქუჩაზე დააკავა, სადაც ის ხატიაშვილების ოჯახის გამოსახლებისას, საპოლიციო ძალების მიერ დემონსტრანტებსა და ჟურნალისტებზე ძალადობის ფაქტების გასაშუქებლად მივიდა.