პროკურატურის განცხადებით, ქვემო ქართლის გადამდგარი ვიცეგუბერნატორის, გიორგი შინჯიკაშვილის მამას ტვ პირველის ჟურნალისტის თავდასხმის ფაქტზე ბრალდება წარედგინა.

"დაკავებულს ბრალდება საქართველოს სისხლის სამართლის კოდექსის 126-ე მუხლის პირველი პრიმა ნაწილის "გ" ქვეპუნქტით (ძალადობა, რამაც დაზარალებულის ფიზიკური ტკივილი გამოიწვია) და 154-ე მუხლის პირველი ნაწილით (ჟურნალისტისათვის პროფესიულ საქმიანობაში უკანონოდ ხელის შეშლა, ესე იგი მისი იძულება, თავი შეიკავოს ინფორმაციის გავრცელებისაგან) წარედგინა, რაც სასჯელის სახედ და ზომად, 2 წლამდე თავისუფლების აღკვეთას ითვალისწინებს," — წერს უწყება.

12 მაისს, ტვ პირველის ჟურნალისტი მარიამ მაკასარაშვილი და ტვ პირველის ოპერატორი გიორგი შინჯიკაშვილის საცხოვრებელ სახლთან იმყოფებოდა და გადამდგარი ვიცეგუბერნატორის თანამდებობიდან წასვლის შესახებ შეკითხვებს შინჯიკაშვილის მამას უსვამდნენ. ინტერვიუს დასრულების შემდეგ შინჯიკაშვილის მამა მოულოდნელად აგრესიული გახდა და ფიზიკურად იძალადა ჟურნალისტზე და ოპერატორზე. მომხდარი თავდასხმის დროს ჟურნალისტმა მარიამ მაკასარაშვილმა ტვინის შერყევა მიიღო.