მოძრაობა "რუსთაველის გამზირის" წარმომადგენელი, პაატა ბურჭულაძე, გამოეხმაურა ირაკლი კობახიძის განცხადებას, რომელშიც ის ამბობს, რომ გადადგომას არავინ აპირებს. მსოფლიო ბანი "ოცნების" ხელისუფლების პრემიერს ურჩევს, რომ "არ გაიქცეს".

ასევე, იგი ამბობს, რომ 4 ოქტომბრის გეგმა 16:00 საათზე გასაჯაროვდება

"ჩვენ გვაქვს გეგმა, რომელსაც არ ვასაჯაროებთ, ჩვენ მათი გეგმები ყველაფერი გავიგეთ, მათი მთელი სქემები, ერთი გეგმაც ვერ გაიგეს რა გვაქვს. აქ, ოთხ საათზე რომ შევიკრიბებით, გამოცხადდება რა გვაქვს და მერე ნახოს გადადგება თუ გაიქცევა. მე ერთი თხოვნა მაქვს, არ გაიქცე, იდექით, ბატონო ირაკლი და თქვენი თანამშრომელი რამდენიმე ადამიანი და ჩვენ განახებთ, რა გეგმა გვაქვს ჩვენ", — განაცხადა პაატა ბურჭულაძემ.

მან ისიც თქვა, რომ ძალოვნები ავტობუსებიდან ხელს უქნევდნენ. იგი იმედოვნებს, რომ დღეს გდდ-ს თანამშრომლები უკანონო ბრძანებებს არ დაემორჩილებიან.

"ბატონებო, დღეს არის ისეთი დღე, რომ ყველანი ვიამაყებთ, რომ ეს დღე დადგა, როგორც იქნა, ველოდებოდით დიდი ხანი. კიდევ ერთი რამ მინდა ვთქვა, რომ ის ბიჭები, დარწმუნებული ვარ, ვინც იქიდან ხელს გვიქნევდნენ და თითებს გვაჩვენებდნენ, ისინი ხალხის წინააღმდეგ არ წამოვლენ და თუ ვინმე მისცემს ბრძანებას და იმ ბრძანებას ვინმე შეასრულებს, გდდ მაქვს მხედველობაში, ძალიან ინანებენ. ხალხის რისხვას ისინი ვერ გაექცევიან, ამიტომ ვიყოთ ერთად, ჩვენ ვართ ძალიან მართლები და გავიმარჯვებთ აუცილებლად", — თქვა ბურჭულაძემ.

4 ოქტომბრის თვითმმართველობის არჩევნებში მონაწილეობაზე უარს ამბობს 8 ოპოზიციური პარტია, მათ შორის ის 2 კოალიცია — ცვლილებისთვის და ნაციონალური მოძრაობა, რომლებმაც ცესკო-ს მონაცემებით, 2024 წლის ოქტომბრის არჩევნებში ოპოზიციურ პარტიებს შორის ყველაზე მეტი ხმა მიიღეს.

ბოიკოტის რეჟიმში მყოფი ოპოზიციური პარტიები აცხადებენ, რომ არჩევნებში შესვლა ოცნებისთვის ლეგიტიმაციის მიცემას ნიშნავს და სასურველ ციფრებს ოცნება მაინც დაიწერს. თვითმმართველობის არჩევნების დღეს, 4 ოქტომბერს ოპოზიციური პარტიები და აქტივისტები რუსთაველზე აქციას გამართავენ. ორგანიზატორებს შორის არიან ნაციონალური მოძრაობის და მოძრაობა რუსთაველის გამზირის წარმომადგენლები. ისინი აცხადებენ, რომ ამ დღეს ოცნების ხელისუფლებას "მშვიდობიანად დაამხობენ".