დიდი ბრიტანეთის მიერ სანქცირებული ბიზნესმენი ლევან ვასაძე წერილს ავრცელებს სადაც აცხადებს, ქართულმა ბანკებმა, სადაც მას და მის ოჯახს ანგარიშები ჰქონდა, საბანკო მომსახურება შეუზღუდეს.

"საქართველოს საბანკო სისტემამ დევნა განახორციელა არა მხოლოდ ჩემი, არამედ ჩემი ოჯახის წევრების მიმართაც", — აცხადებს ვასაძე.

მისი შეფასებით, "მსგავს ქმედებას წარსულში მხოლოდ "ბოლშევიკები" და ნაცისტები თუ სჩადიოდნენ".

ლევან ვასაძე წერს, რომ ლონდონის საფონდო ბირჟაზე რეგისტრირებულმა თიბისი ბანკმა მისი და მისი ცოლის ყველა ანგარიში და საკრედიტო ბარათი, ასევე, მისი სრულწლოვანი შვილების, დის და დედის ანგარიშები დაბლოკა.

"იგივე ბედი ეწია ღვინის საწარმოს ანგარიშებს, რომელიც ჩემს საკუთრებაში კი არ არის, არამედ ჩემს მეუღლეს ეკუთვნის და მის მიერ იმართება.

მოგვიანებით, ლონდონის საფონდო ბირჟაზე რეგისტრირებულმა კიდევ ერთმა ქართულმა ბანკმა — "საქართველოს ბანკმა" — მოითხოვა, რომ ჩემი მეუღლის მფლობელობაში მყოფ ღვინის საწარმოს მათთან არსებული ყველა ანგარიში დაეხურა. ამგვარად, "თიბისი"-სთან ერთად, საქართველოს ბანკმაც საფრთხის ქვეშ დააყენა ასობით საქართველოს მოქალაქის სამუშაო ადგილი და ათასობით ქართველი მევენახის შემოსავალი. მათ დარტყმა მიაყენეს საქართველოს ყველაზე კეთილშობილ აგრარულ დარგს — მეღვინეობას, რომელიც ქვეყნისთვის ექსპორტისა და საგადასახადო შემოსავლის წყაროა.

ამას მოჰყვა ის, რომ სხვა ქართულმა ბანკებმაც, სადაც მე და ჩემს ოჯახს ანგარიშები გვქონდა, შეზღუდეს ჩვენი საბანკო მომსახურება", — დაწერა ვასაძემ.

ვასაძის განცხადებით, ის არც ქართველი პოლიტიკოსია, არც მედიამაგნატი და არასოდეს გაუვრცელებია არავითარი "პრორუსული დეზინფორმაცია". ვასაძე ბრიტანეთის მთავრობის მიერ მისი სანქცირების მიზეზს მცდარს უწოდებს. მისივე თქმით ბრიტანეთის მთავრობა ან შეცდომაში შეიყვანეს არასამთავრობო ორგანიზაციებმა, ან ეს "მცდარი ბრალდებები" სხვა, მისთვის უცნობი მიზეზით დევნის გასამართლებლადაა გამოყენებული.

"2025 წლის 19 სექტემბერს, პარასკევს, ბრიტანეთის მთავრობამ თავისი ოფიციალური ვებგვერდის (www.gov.uk) საშუალებით ჩემს მიმართ გამოაცხადა სანქციები შემდეგი მცდარი ფორმულირებით: "ქართველი პოლიტიკოსი და მედიამაგნატი ლევან ვასაძე გახდა სამიზნე იმის გამო, რომ საკუთარი მედიაპლატფორმებით პრორუსულ დეზინფორმაციას ავრცელებს". ქვემოთ დავამტკიცებ, რომ ამ ფორმულირებაში თითოეული განცხადება მცდარია. მე არც ქართველი პოლიტიკოსი ვარ, არც მედიამაგნატი და არასოდეს გამივრცელებია არავითარი "პრორუსული დეზინფორმაცია"... ან ბრიტანეთის მთავრობა მიზანმიმართულად შეიყვანეს შეცდომაში იმ არასამთავრობოებმა, რომლებიც ჯორჯ სოროსისა და USAID-ის მსგავსი ორგანიზაციების დაფინანსებით მოქმედებენ, ან ეს მცდარი ბრალდებები უბრალოდ გამოყენებულია სხვა, ჩემთვის უცნობი მიზეზით ჩემი დევნის გასამართლებლად"., — აღნიშნულია ვასაძის განცხადებაში.

ლევან ვასაძე წერს, რომ თუ "ბრიტანეთის მთავრობა კვლავაც განაგრძობს ტრადიციული ქართული საზოგადოების აღქმას, როგორც დამღუპველი ლიბერალურ-გლობალისტური დღის წესრიგის დაუმორჩილებელ მსახურებად", ის ამ სანქციებს "საპატიო ნიშანივით ატარებს".

"თუ, სამწუხაროდ, ბრიტანეთის მთავრობა კვლავაც განაგრძობს ტრადიციული ქართული საზოგადოების აღქმას, როგორც დამღუპველი ლიბერალურ-გლობალისტური დღის წესრიგის დაუმორჩილებელ მსახურებად, მე ამ სანქციებს, მათი საბოლოო გაუქმებამდე, ვატარებ საპატიო ნიშანივით" — წერს ვასაძე 20 სექტემბრით დათარიღებულ წერილში.

ცნობისთვის, ლევან ვასაძე ბრიტანეთის მთავრობამ ლევან ვასაძე უკრაინაში რუსეთის ომის მხარდამჭერი განცხადებების გამო, 19 სექტემბერს ოთარ ფარცხალაძესთან ერთად დაასანქცირა.