საქართველოში ვიზიტით იმყოფებოდა ეუთოს წარმომადგენელი მედიის თავისუფლების საკითხებში ჰარლემ დეზირი. მან მედიის კუთხით საქართველოში კონსტიტუციაში შეტანილი ცვლილებები დადებითად შეაფასა, ინტერნეტთან წვდომისა და თავისუფლად გამოყენების ნაწილში, თუმცა გამოთქვა კრიტიკა რუსთავი 2-ისა და აფგან მუხტარლის საქმის გარშემო მიმდინარე მოვლენებზე.

ვიზიტისას დეზირი საქართველოს საგარეო საქმეთა მინისტრს მიხეილ ჯანელიძეს, პარლამენტის თავმჯდომარის პირველ მოადგილეს, თამარ ჩუგოშვილს, სახალხო დამცველს, უჩა ნანუაშვილსა და მედიისა და სამოქალაქო საზოგადოების წარმომადგენლებს შეხვდა. შეხვედრებზე განხილული იყო მედიის თავისუფლება საქართველოში და ამ კუთხით განვითარებული მოვლენები. დეზირის თქმით, "საზოგადოებრივი მაუწყებლის რეფორმის პროცესი, უნდა იყოს ღია და ინკლუზიური, რათა რისკის ქვეშ არ მოექცეს მისი დამოუკიდებლობა, ანგარიშვალდებულება და განსხვავებული აზრის წარმოჩენა".

მან ხაზი გაუსვა რუსთავი 2-ის გარშემო მიმდინარე პროცესს და განაცხადა, რომ არხს უნდა ჰქონდეს სარედაქციო დამოუკიდებლობის უფლება და შეეძლოს პროფესიული საქმიანობის განხორციელება. მისი თქმით, "ეს ქართველი ხალხის ინტერესშია". ამასთან, დეზირიმ საქართველოს ხელისუფლების წარმომადგენლებთან შეხვედრისას ისაუბრა აზერბაიჯანელი ჟურნალისტის აფგან მუხტარლის საქმეზე, რომელიც მაისში გაიტაცეს, რის შემდეგაც ის აზერბაიჯანში პატიმრობაში იმყოფება. დეზირიმ აღნიშნა, რომ საქართველოში ჟურნალისტებისთვის უსაფრთხო გარემოს შექმნა მნიშვნელოვანია. ის მუხტარლის მეუღლეს, ლეილა მუსტაფაევას შეხვდა.

"მისი გატაცება ჩემთვის შეშფოთების მთავარი მიზეზია, ვინაიდან აქამდე საქართველოში ჟურნალისტებისთვის უსაფრთხო გარემო იყო. მე მოვუწოდებ ხელისუფლებას, რომ გამჭირვალედ წარმართოს გამოძიება", - თქვა მან.

ეუთოს წარმომადგენელი მედიის თავისუფლების საკითხებში რეგულარულად აფასებს და აღწერს ორგანიზაციის 57 წევრ სახელმწიფოში მიმდინარე მოვლენებს მედიის კუთხით.