რუსეთის საგარეო საქმეთა მინისტრი სერგეი ლავროვი გაეროს გენერალური ასამბლეის მიმდინარე სესიაზე დასასწრებად ნიუ-იორკში ჩავიდა. ინფორმაციას Kyiv Independent რუსულ მედიაზე დაყრდნობით ავრცელებს.

მედიის ცნობით, ასამბლეის ფარგლებში ლავროვს შეერთებული შტატების სახელმწიფო მდივანი მარკო რუბიო შეხვდება.

რუსული სახელმწიფო მედიის ინფორმაციით, სერგეი ლავროვის ფრენა მოსკოვიდან ნიუ-იორკის მიმართულებით თითქმის 12 საათი გაგრძელდა, რადგან რუსულ თვითმფრინავს უკრაინის მოკავშირეების მიერ დაწესებული საავიაციო შეზღუდვების გამო სხვადასხვა ქვეყნის საჰაერო სივრცის არიდება მოუწია.

რაც შეეხება გაეროს გენერალურ ასამბლეას, ცნობილია, რომ მასში რუსეთის პრეზიდენტი ვლადიმერ პუტინი არ მონაწილეობს. უკრაინის პრეზიდენტი ვოლოდიმირ ზელენსკი კი ასამბლეის ფარგლებში აშშ-ს პრეზიდენტს, დონალდ ტრამპს, გუშინ, 23 სექტემბერს შეხვდა. მანამდე, 22 სექტემბერს ზელენსკიმ შეხვედრა გამართა აშშ-ის სპეციალურ წარმომადგენელ კიტ კელოგთან და სხვა ოფიციალურ პირებთან. მომავალ კვირაში ასევე გაიმართება ყირიმის პლატფორმის ყოველწლიური და "უკრაინელი ბავშვების დაბრუნების კოალიციის" ლიდერების სამიტი.