საქართველოს პრეზიდენტის ადმინისტრაციის ინფორმაციით, საკონსტიტუციო ცვლილებების პროექტთან დაკავშირებით პრეზიდენტი გიორგი მარგველაშვილი ქართულ ოცნებაზე შეხვედრაზე იწვევს. შეხვედრა ოთხ ოქტომბერს 16:00 საათზე გაიმართება.

ადმინისტრაციის უფროსის, გიორგი აბაშიშვილის თქმით, ეს შეხვედრა პოლიტიკურ საკითხებზე სპეკულაციების დასრულების მიზნით იმართება:

"თითქმის კვირაზე მეტია საქართველოს პრეზიდენტი აცხადებს, რომ მზად არის ასეთი შეხვედრისათვის. პრეზიდენტი ყოველთვის ღიაა უმნიშვნელოვანეს პოლიტიკურ საკითხებზე საკომუნიკაციოდ ყველა პოლიტიკურ პარტიასთან, მათ შორის, ცხადია, ქართულ ოცნებასთან, მაგრამ კვლავ ადგილი აქვს სპეკულაციას, მიუხედავად იმისა, რომ სხვა კომუნიკაციაც იყო."

26 სექტემბერს, საქართველოს პარლამენტმა კონსტიტუციის პროექტი მესამე მოსმენით მიიღო. კანონპროექტის მიღებას მხარი 117-მა დეპუტატმა დაუჭირა. კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები.

კონსტიტუციის პროექტის საბოლოო ვერსიაზე პრეზიდენტმა დადგენილ ათი დღის ვადაში უნდა მიიღოს გადაწყვეტილება, დაადებს თუ არა ვეტოს ქვეყნის მთავარ კანონს, თუ მის ცალკეულ ნაწილებს.

პარლამენტის თავმჯდომარემ, ირაკლი კობახიძემ, კონსტიტუციის მიღების შემდეგ, პრეზიდენტს შესთავაზა, რომ ვეტოს უფლება მხოლოდ ბონუსის სისტემის გაუქმებისა და ბლოკების ერთჯერადად შენარჩუნების ნაწილში გამოიყენოს. მისივე თქმით, ამით, პრეზიდენტს შეუძლია, საკონსტიტუციო ცვლილებების ექვსთვიან პროცესში პირველად ითამაშოს "კონსტრუქციული" როლი.

გიორგი მარგველაშვილმა მმართველ პარტიასა და იმ პოლიტიკურ ძალებს, რომლებიც ჩართულები იყვნენ საკონსტიტუციო პროცესში, პრეზიდენტის სასახლეში კონსულტაციების გამართვა შესთავაზა. შეხვედრას არ დაესწრო მმართველი პარტია, რადგან, პარლამენტის თავმჯდომარის თქმით, ამ საკითხების გარშემო უნდა მოეწყოს ისინი ცალკე უნდა შეხვდნენ ერთმანეთს.