პროკურატურამ კოალიცია ცვლილებისთვის ერთ-ერთ ლიდერს, ელენე ხოშტარიას ბრალდება წაუყენა. ოპოზიციონერ პოლიტიკოსს 570 ლარის ოდენობის ზიანს ედავებიან. უწყების განცხადებით, ხოშტარიას სისხლის სამართლის კოდექსის 187-ე მუხლის პირველი ნაწილით ედავებიან, რაც ერთიდან ხუთ წლამდე პატიმრობას ითვალისწინებს.

"შინაგან საქმეთა სამინისტროს მიერ ჩატარებული გამოძიებით დადგინდა, რომ მიმდინარე წლის 14 სექტემბერს, თბილისში, ბრალდებულმა განზრახ დააზიანა პოლიტიკური პარტია "ქართული ოცნება, დემოკრატიული საქართველოს" საარჩევნო შტაბზე განთავსებული სამი ბანერი, რამაც გამოიწვია ქონებრივი ზიანი 570 ლარის ოდენობით.

სამართალდამცველებმა ელენე ხოშტარია მიმდინარე წლის 15 სექტემბერს დააკავეს. მას ბრალდება საქართველოს სისხლის სამართლის კოდექსის 187-ე მუხლის პირველი ნაწილით (სხვისი ნივთის დაზიანება, რამაც მნიშვნელოვანი ზიანი გამოიწვია) წარედგინა, რაც სასჯელის სახედ და ზომად ერთიდან ხუთ წლამდე თავისუფლების აღკვეთას ითვალისწინებს," — ვკითხულობთ უწყების განცხადებაში.

14 სექტემბერს, ელენე ხოშტარიამ კახი კალაძის ბანერზე დააწერა "რუსული ოცნება". მისი განცხადებით, ამ ჟესტით სოლიდარობა გამოხატა 23 წლის აქტივისტ მეგი დიასამიძისადმი, რომელმაც კალაძის საარჩევნო შტაბის ბანერზე "რუსული ოცნება" დააწერა, რის გამოც დააკავეს. მეგი დიასამიძესთან ერთად, ჯგუფური ძალადობის ბრალდებით დაკავებული ოცნების მხარდამჭერების წინააღმდეგ სამართლებრივი დევნა შეწყდა — ხოლო ბანერზე წარწერისთვის დაკავებული მეგი დიასამიძე 2000-ლარიანი გირაოს სანაცვლოდ გაათავისუფლეს.