29 სექტემბერს, გვიან ღამით, კლუბიდან Khidi გამოსულ 20 წლამდე გეი ბიჭს, სავარაუდოდ, ჰომოფობიურ ნიადაგზე სამი პირი დაესხა თავს. ამის შესახებ On.ge-ს ადვოკატი, ნინო ბოლქვაძე ესაუბრა.

ბოლქვაძის ინფორმაციით, კლუბიდან გამოსვლის შემდეგ, ახალგაზრდამ კეფაში დარტყმა იგრძნო, შემდეგ კი სამმა პირმა ცემა დაუწყო:

"თავს ვერ იცავდა, აქვს დალურჯებები, სავარაუდოდ ტვინის შერყევა, შოკურ მდგომარეობაში იყო."

ნინო ბოლქვაძე ვარაუდობს, რომ თავდასხმა ჰომოფობიურ ნიადაგზე მოხდა, რადგან ბიჭს უკეთია საყურე და ფიზიკურად იდენტიფიცირებადია როგორც გეი. ადვოკატის ცნობით, სექსუალური ორიენტაციის გამო, ახალგაზრდა უარყოფილია ოჯახის მიერ და ცხოვრობს მარტო.

"მანამდეც ჰქონია პრობლემები უბანში სადაც ცხოვრობს, ძველ ბიჭებს გაუფრთხილებიათ, რომ გადადი აქედან, თორემ მერე ჩვენ ვიცით," - ამბობს ნინო ბოლქვაძე.

ადვოკატის ინფორმაციით, დაზარალებული ჯერ-ჯერობით თავს იკავებს ინციდენტის პოლიციისთვის შეტყობინებისგან. როგორც On.ge-ს შინაგან საქმეთა სამინისტროში უთხრეს, აღნიშნულ ფაქტთან დაკავშირებით უწყებაში შეტყობინება არ შესულა.