ღამით რუსებმა ზაკარპატიის რეგიონს რაკეტებით შეუტიეს და მუკაჩევოში საყოფაცხოვრებო ტექნიკის მწარმოებელი ამერიკული კომპანიის ქარხანა დაბომბეს.

ინფორმაციას უკრაინული მედია ზაკარპატიის რეგიონული სახელმწიფო ადმინისტრაციის თავმჯდომარის, მიროსლავ ბილეცკის, საგარეო საქმეთა სამინისტროს ხელმძღვანელ ანდრეი სიბიგას და უკრაინის სახელმწიფო საგანგებო სიტუაციების სამსახურის პრესსამსახურის განცხადებებზე დაყრდნობით ავრცელებს.

ბილეცკის თქმით, ობიექტს დაახლოებით 04:40 საათზე ორი "კალიბრის" რაკეტა მოხვდა. თავდასხმის შედეგად, საწარმოს 12 თანამშრომელი დაშავდა, ყველა საავადმყოფოში გადაიყვანეს. ორი მათგანი მძიმე მდგომარეობაშია, დანარჩენებმა კი საშუალო სიმძიმის დაზიანებები მიიღეს.

სახელმწიფო საგანგებო სიტუაციების სამსახურის ცნობით, დაშავდა სულ მცირე 15 ადამიანი. დაახლოებით 7 ათასი კვადრატული მეტრის ფართობის ქარხნის ტერიტორიაზე მასშტაბური ხანძარი გაჩნდა.

როგორც უკრაინის საგარეო საქმეთა მინისტრმა ანდრეი სიბიგამ განმარტა, დარტყმა მიაყენეს მსხვილ ამერიკულ ელექტრონიკის მწარმოებელს.

მან აღნიშნა, რომ ობიექტი მთლიანად სამოქალაქოა და სამხედრო ინფრასტრუქტურასთან არაფერი აქვს საერთო.

"ეს არ არის პირველი რუსული თავდასხმა ამერიკულ საწარმოებზე უკრაინაში, წელს კიევში Boeing-ის ოფისებზე განხორციელდა დარტყმები", — თქვა სიბიგამ.