ბორჯომის პირველი საჯარო სკოლის მოსწავლეებმა, 27 სექტემბერი, სოხუმის დაცემის დღე, ქალაქის ცენტრში, ასფალტზე ხატვის აქციით აღნიშნეს, რა დროსაც ხელში ქართული ოცნების დროშები ეჭირათ. ამის შესახებ ინფორმაციას ადგილობრივი მედიასაშუალება, ბორჯომი ტვ ავრცელებს.

ხატვის პედაგოგი, ნათელა ღლონტი ამავე მაუწყებელთან საუბარში ამბობს, რომ მსგავს აქციას ის ყოველ წელს ატარებს:

"არ შეიძლება პარტიის დროშა, ბავშვები არიან აპოლოტიკურები. ეს ჩვეულებრივი დროშაა და ჩვეულებრივად გამოვიტანე. თუმცა, ეტყობა ჩავიჭერი".

განათლების სამინისტროში On.ge-ის განუცხადეს, რომ სკოლა თავისუფალი უნდა იყოს პოლიტიკისა და პოლიტიკური აგიტაციისგან, შესაბამისად ფაქტს მოიკვლევს სამინისტროს შიდა აუდიტის დეპარტამენტი და თუ დადასტურდა, სამინისტრო შესაბამის ზომებს მიიღებს.

ქართული ოცნების დროშების სკოლებში გამოყენების ფაქტები მანამდეც იყო. სოფელ მუხურას საჯარო სკოლაში ქართული ოცნების დროშის დაკიდების ამსახველი ფოტოები პარტია ევროპული საქართველოს წევრმა ოთო კახიძემ გაავრცელა.

უფრო ადრე კი, შუახევის მუნიციპალიტეტის სოფელ სხეფის საჯარო სკოლის მასწავლებელმა, მარინა დარჩიძემ ფეისბუკით ფოტო გაავრცელა, სადაც პირველი კლასის მოსწავლეები მმართველის პარტიის - ქართული ოცნების დროშებით არიან გადაღებული.

აღნიშნული მასწავლებლის მიმართ, ცენტრალურმა საარჩევნო კომისიამ ადმინისტრაციულ სამართალდარღვევათა ოქმი შეადგინა. მოკვლევის საფუძველზე შედგენილი სამართალდარღვევის ოქმი, რომელიც 1000-ლარიან ჯარიმას ითვალისწინებს, შემდგომი რეაგირებისთვის შესაბამის სასამართლოს გადაეგზავნა.