საქართველოს პრეზიდენტი, გიორგი მარგველაშვილი მმართველ პარტიასა და ყველა იმ პოლიტიკურ ძალას, რომელიც ჩართული იყო საკონსტიტუციო პროცესში, ხვალ, 28 სექტემბერს პრეზიდენტის სასახლეში კონსულტაციების გამართვას სთავაზობს. ამის შესახებ პრეზიდენტის პრესსპიკერმა, ეკა მიშველაძემ ბრიფინგზე განაცხადა.

პარლამენტის თავმჯდომარემ, ირაკლი კობახიძემ, კონსტიტუციის მიღების შემდეგ, პრეზიდენტს შესთავაზა, რომ ვეტოს უფლება მხოლოდ ბონუსის სისტემის გაუქმებისა და ბლოკების ერთჯერადად შენარჩუნების ნაწილში გამოიყენოს.

მისივე თქმით, ამით, პრეზიდენტს შეუძლია, საკონსტიტუციო ცვლილებების ექვსთვიან პროცესში პირველად ითამაშოს "კონსტრუქციული" როლი.

პრეზიდენტის საპარლამენტო მდივანმა, ანა დოლიძემ კობახიძის შეთავაზებას "არასერიოზული" და "წარმოუდგენელი" უწოდა.

26 სექტემბერს, საქართველოს პარლამენტმა კონსტიტუციის პროექტი მესამე მოსმენით მიიღო. კანონპროექტის მიღებას მხარი 117-მა დეპუტატმა დაუჭირა. კენჭისყრას არ ესწრებოდნენ ნაციონალური მოძრაობისა და ევროპული საქართველოს დეპუტატები. კონსტიტუციის პროექტის საბოლოო ვერსია უკვე გადაუგზავნეს პრეზიდენტის ადმინისტრაცია, რომელმაც დადგენილ ათი დღის ვადაში უნდა მიიღოს გადაწყვეტილება, დაადებს თუ არა ვეტოს ქვეყნის მთავარ კანონს.