ირლანდიის ხელისუფლების გადაწყვეტილებით, მომავალ წელს აბორტის ლეგალიზაციის საკითხთან დაკავშირებით რეფერენდუმი ჩატარდება.

ირლანდიაში აბორტი კონსტიტუციურად აკრძალულია. კონსტიტუციის მერვე შესწორებით, აბორტის გაკეთება 14 წლამდე თავისუფლების აღკვეთით ისჯება.

აბორტი ირლანდიაში თითქმის ყოველთვის არაკანონიერი იყო, თუმცა მსგავსი სახით აბორტის შესახებ კანონი 1983 წლის რეფერენდუმის შემდეგ მიიღეს. მაშინ აბორტების აკრძალვას მხარი მოსახლეობის 67 პროცენტმა დაუჭირა. აბორტები აკრძალულია ქვეყნის მთელ ტერიტორიაზე, შესაბამისად, ყოველწლიურად ათასობით ქალი აბორტის გასაკეთებლად ირლანდიის საზღვრებს გარეთ, ძირითადად ინგლისში გადადის.

მთავრობამ უკვე შეათანხმა ქვეყნის პარლამენტთან რეფერენდუმის ჩატარების საკითხი, დაახლოებით ცნობილია თარიღიც. რეფერენდუმი აბორტის საკითხზე, დიდი ალბათობით, ივნისში ჩატარდება, რომის პაპის ვიზიტამდე რამდენიმე კვირით ადრე.

ირლანდია არაერთხელ გამხდარა კრიტიკის ობიექტი აბორტის შესახებ კანონმდებლობის გამო. კანონს არაჰუმანურს და დამამცირებელს უწოდებდა არაერთი საერთაშორისო ორგანიზაცია, მათ შორის გაეროც.

ქვეყნის პრემიერ-მინისტრის, ლეო ვარადკარის განცხადებით, ნებისმიერი კონსტიტუციური ცვლილება მოსახლეობის დიდ ყურადღებას და მაქსიმალურ ჩართულობას მოითხოვს. მისი შეფასებით, მოქმედი კანონმდებლობა ზედმეტად მკაცრია.